Wafen vber die gar vngv̊ten

Wafen vber die gar vngv̊ten·
die da selten werdent fro·
die heis ich die vngemv̊ten·
des ist ir nam von reht also·
wafen vber si iemer mere·
si verliesent mit ir truren selde vnd ere·

Swa ein wib niht fro gemachen·
kan ir herzelieben man·
mit ir trúten mit ir lachen·
dem ist froͤide gar zergan·
froͤit in niht ir suͤsses losen·
in gemachent niemer fro des meien rosen·

Ich bin fro von einer rosen·
dú kan sprechen svͤssú wort·
ir vil lieplich gvͤtlich losen·
git mir hoher froͤiden hort·
mit ir klein vel roten mvnde·
zúht si mir truren gar vs herzen grunde·

Schowent wie dú bin ir svͤsse·
vs den blv̊men ziehen kan·
also ziehent mir ir gruͤsse·
truren von dem herzen dan·
ir vrlup vnd ǒch ir gruͤssen·
kan si mir mit svͤssen worten sv̊sse svͤssen·

Si hat hohes mv̊tes krone·
mit ir guͤte mir gegeben·
die han ich von ir zelone·
des mv̊s min mv̊t hohe sweben·
wol ir dc si mich so kroͤnet·
vnd ir wibheit mit vil hohen tugenden schoͤnet·