Venvs dú feine dú ist entslafen
[384r]
VEnvs dú feine dú ist entslafen·
dú wilent hoher minne wielt·
des schrîet manig frowe wafen·
dú von ir helfe sich enthielt·
dc man ir svͤsse minne schúhet·
vnd ir vil minneklichen lip·
vnd aller froͤide sich enzúhet·
dur der vil argen herren[WS 1] kib·
Die lange sint· an minne blint·
vnd in dien reisen wol gesehent[WS 2]·
schúrf vnd schint· schaf vnd rint·
dc sint die minne die si spehent·
Her mars der rihset in dem lande·
der hat den werden got amvr·
verhert mit rǒbe vnd ǒch mit brande·
des sint die minne worden svr·
die man hie vor vil svͤsse erkande·
do riualis vnd flantschiflur·
vil kvmbers litten von ir bande·
nv wil der herre vnd der gebur·
Rǒb vnd brant vil gerne vͤben·
dan er die svͤssen minne tuo·
Dc mv̊s dú reinen wib betruͤben·
dú wol gebildet sint dar zv̊·
das man vil gerner solte minnen·
ir zuht ir ere ir werdekeit·
dan ein vil krankes gůt gewinnen·
sin vberkraft [384v] ist worden breit·
Den ich hie vor genennet han·
dc ist der leide strites got·
der froͤiden tor ist zů getan·
dur sin gewalteklich gebot·
Der frowen tanz ist hin geleit·
die schopen die sint worden wert·
fúr einen kranz man gerne treit·
ein beggelhuben oder ein swert·
In dirre witen werlde kreissen·
hat irre samen vns gesat·
ein frowe ist wendelmv̊t geheissen·
der fruht birt mangen valschen rat·
si kan den man dar vf wol reissen·
dc er vnbildes vil begat·
an armen kvͤien vnd an geissen·
vnd an dien lúten die man vat·
Gewalt ist vf der strasse michel·
gerihtes hat man sich verschamt·
dú reht stent krvmber dan ein sichel·
fride vnd genade sint erlamt·
des mv̊s der werlde minne túren·
vnd aller froͤide sin[WS 3] verzigen·
sit man den suͤssen got amv́ren·
an werdekeit hat vber stigen·
Des strites got· vnde sin gebot·
vil sere missehellen kan·
vil mangen man ir valscher rat·
bis vf den tot verleitet hat[WS 4]·
Dc schein dar an· do troie bran·
von der vil werde kúnic paris·
in krieges wis verlor den lip·
dc schv̊f discordia das wib·
Nv wera dich vil werder fúrste amvr·
ê dc man gar verdrvke dich·
Dv mache ir eteslichen iamers svr·
der von der minne zúhet sich·
sit dc dú werlt so gar verzwiuelt ist·
dc si dekeiner froͤide nimit war·
La schowen herre ob dv gewaltic bist·
dv mache dc si strites werden bar·
Vnd lip vf minne sezen·
dú vil hohgemvͤtes[WS 5] birt·
La dú wib ir leides ergetzen·
die an minnen sint verirt·
schús den pfil vnd ǒch die strale·
dú vil mangen hat verwunt·
verdrvke ir vil mit sender kale·
so wirt in div minne kvnt·
Swenne si ir striten lânt·
vnd der[WS 6] kriege abegant·
vnd den frowen bi gestant·
die vil svͤsser minne hant·
Ir riten·
ir striten·
wirt in gar vnmere·
div minne ir sinne·
berǒbet vil der swere·
ir liben· an wiben·
mit froͤiden mv̊s gelingen·
si kvnnen· vil wunnen·
mit hohgemvͤte bringen·
Venus vil werdú kúnigin·
wache ein frowe est an der zit·
din svn amvr der beitet din·
ir varent sament in den strit·
Wirf din fúr vnd ǒch din zvnder·
in ir herze mit gewalt·
die mit kriege stiftent wunder·
mache ir lip an minnen balt·
mit dien senden minne striken·
mache[WS 7] ir kvmber kvmberlich·
lasse ir herze in fúre erstiken·
bis dc si versinnen sich·
Das dú suͤsse minne git·
hohgemuͤte zaller zit·
vnd des froͤide machet wit·
der bi herze liebe lit·
So singent· vnd springent·
mit froͤiden ivnge vnd alte·
ir herzen von smerzen·
si scheidet mit gewalte·
die krenze· die swenze·
werdent vil genême·
die iôpen· die schopen·
dien lúten wider zeme·
Beide rǒp vnd brant·
wirt gestillet sa zehant·
So dú minne wirt bekant·
dú gewaltens ist gepfant·
Werden wib nv sint getroͤstet·
úwer sorge wirt wol rat·
dú minne noch vil manigen roͤstet·
der mit kriegen vmbe gat·
disen tanz hat iv gesvngen·
kv̊nze da von wúrzebvrc·
ir wúnschent dc von siner zvngen·
niemer rime gefliege lvrc·