Ueiger winter hinnen scheide

Ueiger winter hinnen scheide·
mit dir swas vns kan zeleide·
rife wint is vnd sne·
lant^{[WS 1]} walt anger vnd die heide·
wunneklich ir ǒgen weide·
sich genieten iar lank me·
lant vns kleine vogel singen·
lant den svmer swere vns ringen·
lant^{[WS 2]} in ǒwen schone vf dringen
liehte blv̊men vnd den kle·

Eregernden stozlen leigen·
froͤit úch gegen den suͤzen meien·
gegen der froͤidebernden zit·
húre siht man megde reigen·
dar sult ir úh froͤlich zweien·
minne stúr úch nahe lit·
wib sint lieber dinge ein krone·
dienent wiben dc stet schone·
wiblich gvͤte vch lieblich lone·
mit dem besten so si git·

Svmerzit vnd wibes minne·
mannen troͤstet die fúnf sinne·
frowen tůnt gesihte wol·
der gehoͤrde dvrh gewinne·
vogel stimme vs walt vnd inne·
mannes herze erfroͤwen sol·
viol smac tůt^{[WS 3]} sorge sliffen·
kiesen wir svͤze fruht vúr rifen·
lieblich werdú wib an grifen·
wend úch werden senden dol^{[WS 4]}·

Anmerkungen (Wikisource)

1. Vorlage: lat.
2. Vorlage: lat.
3. Vorlage: tů.
4. Vorlage: doln.