Topographia Saxoniae Inferioris:Oschersleben

Oschersleben /

Ein Stättlein / vnd Ampt / im Stifft Halberstatt / an den Magdeburgischen Gräntzen / dahin der Schwedisch General Banner Anno 1641. mit seinem Kriegsvolck / wie auch nach Schwanbeck / nicht weit davon / vnd deßgleichen im Halberstättischen gelegen / vnd denen von Hoim gehörig / kommen ist. Anno 1644. hat sich der also genante Schaffmeister / auß Hornburg / mit 15o. Pferden / etwas weit in das Stifft Halberstatt verlauffen / darüber Er / von einer Schwedischen Parthey / in einem Höltzlein / zwischen Oschers- vnd Aschersleben / vmbringt / vnd biß auff 7. Personen niedergemacht: Er Schaffmeister aber / weil Er gantz vest gewesen / mit Aexten / vnd Barten / zu todt geschlagen / vnd dessen Cörper / allhie zu Oschersleben / auff den Marckt gelegt worden; wie in Tomo 5. Theatri Europaei fol. 583. a. stehet.

Ein viertel Meil wegs von Oschersleben / vnd anderthalb / oder wie Andere sagen / 2. Meilen von Halberstatt / ligt das Dorff Hornhausen / in diesem Stifft Halberstatt / allda den 5. Martii, Anno 1646. ein Heyl- vnd Gesundbronnen entstanden / auff den noch 19. allda erfolget seyn; wie hievon / vnd deren Würckung / besondere Tractätlein außgegangen. In vorgedachtem 5. Theil / deß Europaeischen Schauplatzes / stehet fol. 1117. seq. vnter anderm / daß Hornhausen in das Ampt Oschersleben gehörig / sechs Meilen von Schönbeck an der Elbe / 2. von Magdeburg / vnd anderthalb Meilen von Gröningen gelegen. Es seye diß Dorff für Zeiten sehr groß / vnd von 500. Fewerstätten gewesen / allda das Adeliche Geschlecht von Bornstätt wohnhafft; in dem nächsten Teutschen Krieg aber seyen mehr nit / als 140. Häuser / sampt einer kleinen Kirchen / welche auch sehr verwüstet / übrig blieben: Es lauffe ein heßlicher vnd schwartzer Bach durch das Dorff; der Pfarrer allda habe selbsten außgesagt / daß etwan vmb S. Jacobi dieses 46. Jahrs / bereits über tausent Personen (von dem gedachten 5. Martii an / zu rechnen) / an allerley Seuchen / vnd Gebrechen / gesund worden wären; vnd in deme fast täglichs stumme / taube / blinde / höckerichte / lahme / mit der schweren Noth / vnd dergleichen vnheilsamen Gebresten / behaffte Menschen / nach vnd nach / geheilet wurden / hätte man täglich eitel Gottes Wunder gesehen / vnd erfahren. Der Zeit ist es wieder still davon.