Topographia Helvetiae, Rhaetiae et Valesiae: Rhynow
Zwischen Schafhausen vnnd Eglisaw gelegen / wird bey nahe mit dem Rhein vmbringet / hat aber seinen Anhang / vnnd Eingang vom Turgöw / vnnd Helvetier Erdreich hinein. Ist ein altes Römisches Wesen / Bevestigung vnnd Wachthauß wider die Alemannier gewesen. Heutigs Tags ist es ein gar geringes Stättlein vnd mehrers fast ein Fleck zu nennen. Hat aber ein stattlichs Kloster / in welchem viel Adels / als die Herren von Balm / vnd andere / begraben ligen. Vnd in dieses Benedictiner Kloster muß man auß dem Stättlein vber eine Brücke gehen / vnd hat das Stättlein darneben auch eine Brücken vber Rhein / auff Germanier Gestad / so die vierdte Brück vber Rhein / vnder den Außgang deß Bodensee / ist. Es hat dieses Kloster S. Fundanum auß Schottland zu einem Patronen / der vmb das Jahr Christi 800. allda ein Münch gewesen / vnnd daselbst ruhen soll. Gehört jetzt den Eydgenossen mit einander.