Topographia Bavariae: Müldorff

Müldorff.

Ist ein ErtzBischoffliche Saltzburgische Statt / ein Meil Wegs von Bäyerisch-Oettingen auff der linken Seiten deß Ins / gelegen / so Anno 1640. mehrertheils abgebronnen. Hat ein Voit- vnd Hochgericht / allda auch vor Zeiten ein / oder 2. Collegia, vnnd Schulen / vor die Augustiner Mönch sollen gewesen seyn. An. 1249. hat ErtzBischoff Philippus von Saltzburg einen Synodum allhie gehalten. Vnd hat diese Statt wegen der Schlacht / zwischen den beyden Käysern / Ludovico Bavaro, vnd Friderico Austriaco, auff der Vehenwiesen / zu Ampfing / nicht weit von hinnen / Anno 1312. gehalten / in welcher Käyser Friederich gefangen worden / einen sonderlichen Nahmen bekommen; wiewol auch mehrere Sachen da vorgangen seyn; auch Aventinus libro septimo, folio 378. a. b. schreibet / daß König Odacker auß Böheim / Herzog Heinrichen auß Bäyern / zur Zeit da kein Käyser gewesen / vnnd ehe dann Graff Rudolph von Habspurg erwöhlet worden / ins Land gezogen; weiln aber Pfaltzgraf Ludwig vom Rhein herauff seinem Bruder Heinrichen zu Hülff kommen / habe sich der König vor dem Streit / mit wenigen / durch Mühldorff / in das Land ob der Ens davon gemacht. Da sein KriegsVolck dieses gesehen / haben sie auch die Flucht gen Müldorff zu / geben / denen die Bäyern hinden nach geeylet; vnnd seye die Brück allhie darüber / vnter den Böhmen gebrochen / daß ihrer wol dreytausendt im In ertrancken. Etliche nahmen den Thurn in der Vorstatt ein / wehreten sich allda / die ließ Pfaltzgraff Ludwig mit dem Thurn verbrennen. Viel Böhmische Herren waren gen Mühldorff in die Statt geflohen / die wurden allda von dem Fürsten auß Bäyern belägert / biß sie sich ergaben. Hernach ward Fried gemacht / vnnd gab der König Hertzog Heinrichen / Scheyern in Böheimb / (Brunnerus hat Schittenhofen / part. 3. Annal. pag. 796. sequent.) Ried / Schärding / Newburg am In. Folgendts ward dieses Muldorff von Hertzog Heinrichen in Bäyern Anno zwölff hundert fünff vnnd achtzig eingenommen / nach dem es zuvor außgebronnen war / vnnd noch rauchte. In den Krieg / den die auß Bäyern mit denen von Oesterreich / wegen Tyrol / angefangen / hielte es der ErtzBischoff Pilgrin / ein Oesterreicher von Buchheimb / mit Oesterreich / fiel in Bäyern / vnnd raubete; darumb belägerten die Bäyerfürsten Müldorff. Die Oesterreichischen Gebrüder wollten den Bischoff nicht stecken lassen / sondern zogen in Bäyern / belägerten Ried / daher die Bäyern vor Müldorff wieder abzogen. Als nun denen von Oesterreich die Sach gelungen / zogen sie wider heimbwärts; wie Ger. de Roo in seinen Annal. libro tertio folio centesimo decimo, Item besagter Brunnerus pagin 896. hievon zu lesen.