Topographia Austriacarum: Muerau (Anhang)

Muerau /

Ein Statt / vnnd herrliches Schloß / an der Muer / in Ober-Steyer gelegen; so noch neulich / wie berichtet worden / Herrn Georg Ludwigen / Gravens zu Schwartzenberg / gewesten Crabatisch- vnd Windischen Generaln / etc. (an den diese Herrschafft / durch sein erste Gemahlin / kommen) hinterlassener Fraw Wittib / gehörig gewesen; wiewol man vermeynt / daß künfftig solche Statt / sampt grosser / vnnd weiter Zugehörde / oder der Herrschafft / vnnd Land-Gericht / an hochwolgedachtes Herrn Gravens / Herrn Bruders / gewesten Chur Brandenburgischen Statthalters / Herrn Sohn / Herrn Johann Adolphen / Graven von Schwartzenberg / etc. in Francken / gelangen werde. Es ist / von Muerau / neben denen im Text erzehlten gelehrten Männern / auch Doctor Joannes Oertelius, ein Medicus zu Nürnberg / der Anno 1646. den 18. Januarii daselbst gestorben / bürtig gewesen. Sihe den angezogenen vnsern Text / p. 74. seq. selber / vnnd auch / was in solchem / von dem Dorff / vnd Schloß Ränten / deß Anno 1589. den 7. 17. Aprilis / gebornen Martin Zeillers Vatterland / einkommen ist; der sich etwan auch von Muerau geschriben; weilen seine liebe Eltern / als Herr Martin Zeiller / bey die 40. Jahr gewester Evangelischer Pfarrer / zu besagtem Ränten / vnd dessen Eheliche Haußfraw / Apollonia Vngeratin / zu Murau verbürgert gewesen; auch noch damaln / als Sie / bey vorgenammener Religions-Enderung im Lande Steyer / sich von dannen / vnnd ins Reich begeben / in der langen Gassen daselbst / ein wolerbautes / vnd für Feuer trefflich verwahrtes Hauß gehabt; so Sie aber / wie es in dergleichen Fällen zu geschehen pflegt / mit grossem Schaden / bey ihrem hinweg ziehen / verkauffen müssen. Es ligt aber diese Statt Murau 5. meilen von Friesach / einer Statt in Kärnten; vnnd kompt man / von hinnen auff Teuffenbach 2. Neumarckt / 1. vnd Friesach 2. meilen / von der vornehmsten Statt in Ober-Steyer / nahmlich Judenburg / ligt Murau sechs meilen. Vnd kompt man auch auff obbesagtes Teuffenbach / so ein doppelt Schloß / vnnd Stammhause deß vornehmen Geschlechts von Teuffenbach; davon das alte noch neulich einem Freyherrn von Teuffenbach; das newe Schloß aber einem Herrn Butterer gehört hat. Von dannen hat man ein meil in den Vntzmarckt / vnnd ferners noch 3. meilen gen Judenburg.