Topographia Austriacarum: Marckt Müntzbach

Marckt Müntzbach.

Der vhralte Marckt Müntzbach / ist vor diesem der Keyserlichen Herrschafft / Klingenberg / einverleibs / vnnd von etlich hundert Jahren hero vnterschiedlichen Geschlechtern / insonderheit aber vmb das Jahr 1580. denen Herren von Kolonitsch / Pfandtsweiß zugehörig gewesen / auch bald hernacher / weyland Herrn Lorentzen Schütter / damahlen gewesenen Oberdreysiger zu Vngarischen Altenburg / mit Keyserlichem Consens, sampt dem Eygenthumb eingeantwortet vnnd verkauffet worden; Hierauff nun dieser Marckt / mit ermeldtem Klingenberg / in der Schütterischen Inhabung / neben mehrberührter Herrschafft Windhaag / biß auff das 1629. Jahr verblieben / damahln aber dem Closter Waldhausen / ordinis Canonicorum Regularium S. Augustini, an den Gräntzen deß Lands ob der Enß / gegen beyde Vnter-Oesterreichische Herrschafften Pöckställ vnnd Bösenborg angelegen / verkaufft / vnd ferner vom selbigen Closter / vnter Keyser- vnnd Landsfürstlicher Confirmation, dem jetzigen Herrn Innhaber / Herrn Joachim Freyherrn / zu erstermeldter seiner Herrschafft / gegen andere / vmb das Closter Waldhausen / gelegene Gülten vnnd Vnterthanen / Wechselweiß überlassen / vnnd eingeantwortet worden ist. Derselbe Marckt ist mit sonderbahren Privilegien vnnd Freyheiten von einem Keyser vnnd Landsfürsten zum andern versehen / führet im Wappen einen rothen Krebs / vnnd hat vielbemeldte Herrschafft allda / neben allerley Handwercksleuthen / ein absonderliches Freyhauß / ein wolzugerichtetes Spital S. Barbarae, auff zwölff Personen / fürnemblich eine frey gestifftete Schuel / darinnen eine zimbliche Anzahl Alumni, vnnd andere Knaben / nicht allein in humanioribus studiis, alß rudimentis, Grammatica Latina vnd Graeca, Poësi vnd Rhetorica, sondern auch in Musica vocali vnnd Instrumentali, auff allerley Arth vnterrichtet werden; So ist bey der Pfarrkirchen allda / von dem heiligen Prediger Orden / die Ertz-Brüderschafft JEsu Mariae / vnnd deß ewigen Rosen-Krantzes / noch zu Liechtmessen / anno 1653. canonicè eingeführt / vnnd seythero dermassen fortgepflantzet vnnd außgebreitet worden / daß sich allerley Geist- vnnd Weltliche / auch Hohen vnd Niedern Standes / nur biß auff diß lauffende 1655. Jahr / schon in die vier tausend Personen darein verleibt / allervorderst aber beyde regierende Mayest. der Keyser vnnd Keyserin / wie auch die verwittibte Römische Keyserin / neben Ihro Durchleucht Ertz-Hertzogen Leopoldo Ignatio, sich mit eygenen Händen eingeschrieben haben.