Swer sich mit trúwen wil betragen

Swer sich mit trúwen wil betragen·
der sol sich hvͤten vor den valschen zvngen·
die die lúte da gruͤsen
in der mâsse als der vns crist verriet·
ir herzen mvͤzen kranv̊tz nagen·
die selben haben kúnig karles reht verdrungen·
ir lip der mvͤze buͤssen
als der vf den rate verschiet·
si wellen alle propheten sin·
die die lúte da gruͤsen vnd si denne verraten·
den git man semeln vnd den win·
pfenninge hvͤnre vische vnd veizte braten·
dú miete zúhet sie zv̊ der helle da die selen mvͤssen inne sin·
swer sich vor den vngetrúwen hvͤte· der mvͤze sie mesten sam dú veizten swin·

Dv́ zvnge mvͤsse haben vndank·
dú vor den lúten sprichet also svͤsse·
vnd niender vmbe ir herze lit·
dc ist der sele ein hagel·
merket ob dc niht si ein krang
der den andern wil betriegen mit dem grůze·
vnd im hin nach ein kerder git·
als einer slangen zagel·
der bitters eiters ist so vol·
da mit si heket swen si wil ersterben·
dar zv̊ man den gelichen sol·
der sinen kristen wil verderben·
mit sinen valschen reten· er enweis niht vmbe was·
herre got nv rum vns vor den selben hie· dich eren die getrúwen dester bas·

Lib vnd gv̊t dc ist von got
ein lehen· des doh niht manger wil bedenken·
er wenet dc er iemer hie nach sinem willen leben·
swer in dc saget dc ist ir spot
wc ob in lihte dú selde beginnet wenken·
so mv̊z er denne in spotte dike mit vngemache streben·
das bewert vns gelúkes rat·
dc let vil manigen oben vf in stigen·
als er kvmt vf die hohsten stat·
es let in anderthalb von im sigen·
alrerst so wirt er innen dc er meister ob im hat·
swer grôsses vbermv̊tes vnd vnrehtes gewaltes pfliget· den selben got vil gerne vallen lat·

Warvmbe sint riche herren kark·
die es doh vol enden moͤhten mit ir gvͤte·
mich wundert ob si von dem tode da heime iht hoͤren sagen·
des sint die milten fúr sie kark·
als ichs iv wil bescheiden an ir mv̊te·
si machent dc man sie nach irme tode beginnet klagen·
der milten stuͤle wart nie gesehen·
zehelle noch der armen zehimelriche·
des hoͤr ich noch die wisen iehen·
dc dort ir beider lon si vngeliche·
der karge vert zehelle vnd meret dem tivfel sine schar·
so nimt die milten got zehoue gesinde an sich vnd teilet in mit der engel froͤide gar·