Swer nv verholner minne pfligt

Swer nv verholner minne pfligt·
den wil ich warnen es ist zit·
dc er von liebe scheide·
ob er den lib niht ringe wigt·
so huͤte er sich swer tǒgen lit·
alsus warne ich si beide·
so sang ein wahter an der zinne wol·
sit ich geliebe warnen sol·
so gebe ein lieb vil lieben kvs·
mit nahem vmbevange
vnd scheide sich von liebe alsvs·

So we mir sprach dc reine wib·
di weken tv̊t mir also we·
wie wil der tac so gahen·
si vmbevieng ir frúndes lib·
si sprach sol ich dich iemer me·
mit armen vmbevahen·
vil minneklichen er si vmbevienc·
manig kvs da herzeklich ergienk·
si lagen beide dem gelich·
wie si die naht mit liebe·
der minne pflegen froͤiden rich·

Der frowen ǒgen wurden rot·
dc si ir lieben frúndes brust·
mit trehen gar bererte·
des heldes trúwe im das gebot·
dc si vil dike wart gekvst·
als in dú minne lerte·
er drvhte ir liehtes wengel an das sin·
er sprach vil svͤsse troͤsterin·
min herze an dir niht wenken kan·
min trúwe ist gegen dir stete·
er kvste si vnd schiet von dan·