Swer die wūne
[86v]
Swer die wūne· wol pꝛuͤuen kv́ne· der ſi des gemant·
wan dú zit iſt wūneklich geſtalt·
Wan mag ſchǒwē· an velt an ǒwen· dc iſt mir bekant·
die ſint komē vſ leide·
vogel ſingē· vil ſvͤſſe erklingen· hoͤꝛt man vber al·
ſit ir ſtīme dúſſet dvr den walt·
wie gar ſchone· in ſuͤſſem done· ſchellet nahtegal·
vn̄ lerche vber heide·
Der anger lit· an allen ſtrit· mit blv̊mē wohl beſpꝛeit·
der meie diſe varwe git·
Dú heide lachet· vn̄ machet· maniger hande kleit·
das ir trvrē v̾ſwachet·
der bǒme blv̊t· dú iſt ſo gv̊t· vn̄ ovch dc gruͤne gras·
das dien ǒgen ſanfte tůt·
dem wit gevilde· rifen wilde· ſint ſwie vil der was·
Vn̄ ſnewes vnbilde·
An diſen ſtvndē· ſint gar enbvndē·
vnden· vn̄ ǒch obē berg vn̄ ellú gruͤne tal·
Noch iſt min ſw̾ē· gar ſúftebere·
were· dú zergangē ſeht ſo wolde ich ſingen·
Jch mv̊s in ſoꝛgē· vil mangen moꝛgen·
woꝛgē· ſit ir mūt mich niht entroͤſtet vber al·
Des lide ich kvmber· ich ſender tumb̾·
krumb̾· not mich niht mag ſenelicher twīgen·
Von mīne· ſinne· mir zerrinē wil·
ſi haſſet· laſſet· mich gar ane zil·
Dú reine· meine· danne ein kleine· mich·
vn̄ ſtille· ir wille· wol bedehte ſich·
So wurde ich fro· vn̄ keme es ſo· dc mir noch wurde ir troſt·
ſeht ſo ſtuͤnde min gemvͤte ho·
Wil ſi mir ſwendē· ſoꝛge wendē· ſo wurde ich er loſt·
vn̄ mvͤſte min leit ſich endē·
Si ſelig wib· d̾ nv min lib· iſt lieblich vndertan·
dv́ mag vil wol heiſſen leitv́trib·
Si reine frǒwe· in liehter ſchǒwe· ſol mir froͤide lan·
ſi gelichet roſen in tǒwe·
Jch kroͤne ſchoͤne· frowe dich·
dv biſt ſo mīneklich·
Din ivgende· tvgende· nietent ſich·
vn̄ biſt ǒch froͤidērich·
Mit eren· meren· kanſt dv wol·
din lob mit wirde vol·
Vil ſvͤſſe· buͤſſe· ſende dol·
ſit ich dir dienē ſol·
Jch kv́nde· ſv́nde· die dv tůſt an mir·
ſit dc dv mich búnde· in ſelhe gir·
Jch ſchine· in pine· dc iſt leider war·
vf die beſten trúwe mine·
Nv geile· heile· mir die wnde min·
vō der ſoꝛge meile· wolde ich ſin·
Jch lide· nide· vō dir ſvnderbar·
ſelig frowe die v̾mide·
Vn̄ gib mir rat· min h̾ze hat· gedinge hin ze dir·
ſwie din gvͤte mich in ſoꝛgē lat·
Ich moͤhte erſterbē· ſol min w̾bē· niht erſchieſſē mir·
vn̄ in leide v̾derbē·
Es iſt ein not· ſol ich den tot· alſus vdienet han·
ſit dv́ mīne trvrē mir gebot·
Dú mīne ſtoͤꝛet· vn̄ toͤꝛet· mich an allen wan·
ſit dc ſi mich niht enhoͤꝛet·
Es iſt ein wunder· ſol ich bi ſvnder·
vnder· minē dank v̾derben ſeht dc mv̊s ich klagē·
ach frowe ſcheide· vō ſenedē leide·
beide· mir den mv̊t vn̄ alle mine ſinne·
Sit ich erſchꝛike· ſo dine blike·
[87r] dike mir ein mīnenkliches lachē went v̾ſagen·
Vn̄ ich gedenke· ach ſend̾ ſchenke·
wenke· niht an dienſte ſo beiageſt dv minne·
Durh ere· kere· noch von ſere· mir
gemv̊te· gvͤte wiblich niht embir·
Vn̄ mache· lache· ſoꝛge ſwache· ahý·
min bvrde· wurde· lihter vil da bi·
Vil reine fruht· dvr dine zuht· la mich in froͤiden ſin·
ſo hat ellú ſoꝛge vō mir fluht·
Din mvnt nach roͤte· var vō noͤte· neme dc h̾ze min·
ê dv́ mīne mich ertoͤte·
Nv ſich dar zů· es niht ze frů· vil reine eī ſelig wib·
ald̾ in weis niht wc ich ſend̾ tů·
ach got wie lange· ſelhe plange· hat min ſender lip·
nv hilf dc dú zer gange·
Nement war· gar· dar· war· mir dc herze meine·
den mv̊t· wie kleine· min gv̊t· mich tv̊t· behv̊t·
ſit ich lidē· mv̊s alſo langes niden vō ir·
Jr has· las· bas· dc· h̾ze min v̾meret·
da bi· vn̄ ſweret· ſam bli· ſwie vꝛi· ich ſi
ir gemvͤte· hat niht gvete· gegen mir·
Nv iſt min· ſin· hin· in· ſenelichen dingē·
owe· ſit bꝛingē· mag kle· niht me· als ê·
ſelhe wūne· da vō mir truren kvnne· zergan·
Min ſtrit· git· nit· ſit· dc ich nach ir mīne
ſo ranc· vn̄ ſinne· betwanc· ir danc· iſt kranc·
al dar vnder· gegē mir ſvnd̾· wan·
minnēklichú reine· nv ſich· vn̄ meine· dv mich· ſit ich· An dich·
ſīne kere· dv gib mir ſvͤſſe lere· vn̄ rat·
Lat ſi mich in kumb̾· beſtā· ich tvmb̾· mv̊s lan· den wan· ich han·
grôſſen ſmerzen· den ſi in h̾zen· mir lat·
Ach ich toꝛe· ſit ir oꝛe·
niht enpfahet· vn̄ v̾ſmahet minē ſanc·
dú vil ſchoͤne· mine doͤne·
hoͤꝛet kvme· ich v̾ſv̂me· manigen dank·
ſsit ir ǒgē· niht wen ǒgen·
mir ein ſmierē· vn̄ ein lieblich zwierē· da vō·
Mv̊s ich erben· ein v̾derbē·
in dē ſinne ich bin mīne· niht gewon·
Jch trage· die klage vil mīneklich·
ſit[WS 1] kleine· dv́ reine· mir froͤide git·
Gv̊t· mv̊t· túret mir· vn̄ h̾zen gir·
ſw̾· der· niht enhat· dc gros vnrat·
Wie ſol min h̾ze· fro beſtan·
ſol mir der ſm̾ze· niht zergan·
vn̄ mir niem̾ froͤide gelan·
ſol ich den kvmb̾ iem̾ han·
ſo lebe ich gar· in ſoꝛgen ſchar·
ſSol ich v̾derbē· von der tat·
dc mich min w̾ben· niht v̾uat·
git mir mīne vil kleinen rat·
min mv̊t dar inne trurig ſtat·
vn̄ iſt min leit· vn mâſſē bꝛeit·
Jch bin ane· liebem wane·
mīnen[WS 2] dꝛúke· daſt ein vngelúke· an mir·
Jch gedinge· dc ſi bꝛinge·
mir noch wenne[WS 3]· troſt erkenne· bas an ir·
Wie gezeme· dc ſi neme·
mich in hvlde· ſit ich ſchulde· niene trage·
vn̄ ſi ſpꝛeche· wc ſi reche·
dú vil klůge· dc ſi fůge mir v̾ſage·
Got wolde· ſolde· ir múndel rot·
Mich erlan h̾zeklicher not·
Minne· in ſinne· mir gebot·
dc ich han kv̄ber vf den tot·
Frowe ſwache mir dv́ leit·
vn̄ mache mir froͤide bꝛeit·
vō der ſache wirt ich gemeit·
vn̄ wirt mir heil· ſo bin ich geil·
Gvnne wūne· mir dir zvht·
ſoſt vō mir ellú vngenvht·
lâſſe· mâſſe· reine fruht·
mir zv̊ dir hat min h̾ze fluht·
Trut dv ſetze mich vs klage·
vn̄ ergetze· mich alle tage
vn̄ letze mir ſoꝛgen wage·
vn̄ kvmt es ſo ich [wir]de fro·
Schupfe gupfe· leit hin dan·
wiſe mich liſe· vf minnē ban·
ſit ich noch froͤide nie gewan·
ſo wirt min mv̊t· vn maſſen gv̊t·
Swinde· embinde· mir den ſt́k·
loͤſe· vn̄ oͤſe den ſelbē rik·
dē mir tv̊t diner ǒgen blik·
do ich dich ſach· do ſchꝛei ich ach·
Lebe an ende· ſoꝛge wende·
mit vil armē· wan erbarmē· zimt dir wol·
Da vō leite· niht enbeite·
mich vō ſw̾e· gerne ich w̾e· froͤiden vol·
Swa quale· nimt twale[WS 4]· da wirt man gra·
nie· die pine min ſendes h̾ze v̾lie·
Tů ſoꝛgē froͤwe·[WS 5] mir noch bv̊s·
vil gerne ich ſchǒwe· dinē grůs·
vnz vf den fůs· dir nigen mv̊s·
vil ſelig wib· min ſender lip·
Sit ich dich ṕſe· frowe gv̊t·
vō leide· wiſe· mir den mv̊t·
voꝛ ſoꝛgē flůt· bin ich behv̊t·
vn̄ wirt mir ſchin· dú helfe din·
Gerne ich ſvnge me vn̄ brvnge[WS 6]·
dien die ſingent· vn̄ dꝛinget[WS 7]· diſen ſanc·
durh ir ere·fúr min lere·
w̾dent hoͤne· dis gedoͤne· iſt in ze lanc·
Jch gedinge· d̾ ich ſinge·
dc ſi lerne[WS 8]· doch vil g̾ne· diſē tanz·
[87v] Dú vil gv̊te· wol gemv̊te·
in ir ivgende· hat an tugēde lobes kranz·
Wol vf ir kint ſint· fro· ſo mv̊s· bv̊s· ſoꝛgē ſin·
Trurē var hin· ſin· mv̊t· tůt· geil· heil· w̾dē ſchī·
Wa iſt nv v̊te· vn̄ gv̊t· vn̄ tv̊t· vns ſoꝛgē bar·
Júte vn̄ hille· vn̄ wille· ſtille· komēt dar·
Spꝛingent froͤlich an den tanz·
húre iſt der ſvmer glanz·
da wirt dú froͤde ganz·
man ſiht da manigen kranz·
Frowen nv ſingent· vn̄ dꝛingēt· vn̄ ſpꝛingent·
húbſche tritte·
Rihtent ze minne· die ſinne· dar inne· mit gůtem ſitte·
Pfaffen leigen trettēt an·
dien got der ſelden gan·
er iſt[WS 9] gar ein ſelig man·
der mit dien lútē kan·
Vnder dien lindē· bi húbſchē kinden· ſoꝛgē mv̊s ſwinden·
lachen· machē· kūnen wūnē· wol dú kint·
Erent dē meiien· ſingēt den reijen· ir ſult úch zwiien·
heze· meze· neſe· geſe· goͤtelin·
Jch wil hoͤꝛen es iſt zit·
Jch han der lúte nit·
Wan des reigē iſt ze vil·
des ich erwinden wil·
Jr ſint mvͤde dvnket mich·
eſ iſt vngemēlich·
Schꝛient alle heia hei·
nv iſt der ſeite enzwei·