Swenne ich komen wil von swere
[309r]
Swenne ich komen wil von swere·
so gedenke ich an ein wib·
dú ist schoͤne vnd erebere·
dc ir tugentlicher lib·
hoͤhet minen senden mv̊t·
als einen edelen valken wilde sin gevider in den lúften tůt·
Svͤsser wunsch bi allen wiben·
din hant ere tútschú lant·
dv kanst herzeleit vertriben·
vnd enbinden sorgen bant·
din sint geret ellú wib·
also here vnd also reine ist din froͤidebernder lib·
Ich wande vs dem himelriche·
mich ein engel lachet an·
do ich si sach so minnekliche·
gar von aller swere ich kan·
ich wart aller froͤiden vol·
als ein sele von der wîsse· dú ze himelriche sol·