Svmerzit (Mit originalen Lettern)

Svmerzit·
vns git·
ane widerstrit·
vil der wunnen in dien landen wit·

kalder sne·
tet ê·
kleinen voglin we·
gar zergangen was der gruͤne kle·

da von gar·
stvͤnt bar·
liehter blv̊men schar·
der anger vnwunneklichen var·

Seht der hat·
die wat·
dú ime wol an stat·
Von des liehten meien hant getat·

Der kalde winder lanc·
div kleinen vogelin twanc·
darzv̊ allen ir gesanc·
das ir hoher mv̊t wart kranc·
des habe er vndanc·

Darzv̊ der gruͤne walt·
des argen rifen kalt·
harte schedelich engalt·
Wan sin lop dc wart gevalt·
vil vngezalt·

der vogellinen dos·
Vnd ir vil svͤsser kos·
der ist also gros
wêrst an froͤiden ir genos·
si sint sorgen blos·

Also were ǒch ich·
bedehte sich·
ein wib dur mich·
dú hat gegen mir ir gerich·
dast vngemenlich·

Dis min klage·
die ich trage·
nv vil manige tage·
min herze stat in iamers wage·
dirre pin·
mv̊s sin·
leider lange min·
wil si mir niht tv̊n helfe schin·

Alsus hat min frowe gv̊t·
versenket minen mv̊t·
dc er leider ist vnfrůt·
was dogt mir des meien blůt·
ob si niht entůt·

dvrh mich ein kleine ding·
dc si spreche froͤlich spring·
ich wil lonen dir nv sing·
frǒwe minne si des twing·
ane widerwinc·

mine sinne·
minne·
die ǒge ich dir·
verborgen
sorgen·
sich dc gist dv́ mir·
wan ich han von ir·

Niht me·
wan we·
sit minne mir gebot·
dc ich kvnne
vnwunne·
vnd seneliche not·
bis ir múndel rot·

vil sv̊sse·
in grůsse·
lache mich an·
so ist sorgem vart·
mir gar verspart·
Von leide·
ich scheide·
senender man·
deswar mir wart·
nie wib so zart·

Mir were·
kvmber gar vnmere·
swie ir mvnt nach rosen wol gevar·
der swere·
tete mich lere·
die ich han verborgen lang har·

Vf so rehte lieben wan·
wil ich froͤide han·
vnd mv̊s min truren furder stan·

Ich wil ane sorge leben·
nach dien froͤiden streben·
wil si mir hohgemvͤte geben·

So gewinne ich froͤiden vil·
ob mir dú liebe will
teilen ir minne spil·
nach der ich da harte kil·
ane trostes zil·

Si ist der minne ein bluͤndes zwi·
swa ich in dem lande si·
so gedenke ich dike ahý·
solde ich ir nv wesen bi·
sorgen wurde ich fri·

Ir blik·
den strik·
mir hat gerihtet der minne deswar·
Dar in·
ich bin·
gevallen gar an valschen var·

wil si·
so ist vri·
min lip vor selhem bande·
Ir ivgende·
tugende·
erwelt hat fúr die schande·

Wan sol·
vil wol·
gedenken ir ze dem besten in dem lande·
Swer reht·
erspeht·
ir lip vnd ǒch ir kúsche wol erkande·

La frowe mich niht engelten·
dc ich bin tvmber sinne·
Wan ich v́gisse doch selten·
ze gv̊te din dar inne·

Min mv̊t
ist gv̊t·
swie tvmb er si gegen dir dast ane lǒgen·
Nim war·
wie gar·
ich dir ze dienste bin gebvnden tǒgen·

Swenne ich·
an dich·
gedenke so ist min sorge gar verswunden·
Dar nach·
wirt gach·
ze dien froͤiden mir al da ze den selben stunden·

Also·
wirt fro·
gar min herze vnd min gemvͤte·
Si hat·
den rat·
den man da heisset wibes gvͤte·

Ir ǒgen·
vil tǒgen·
mir blikent dvr min herze·
Ir lachen·
kan machen·
mir bitterliche smerze·

Si will
mich vil·
nach vf den tot betwingen·
wil si·
da bi·
mir swere niht enringen·

Son kan·
nieman·
gepruͤuen wol min hoveliches singen·
Nv wende·
vnd ende·
mine klage la mir an dir· gelingen·

Frǒwe·
schǒwe·
enzit die not·
e liebe·
enkliebe·
dc herze min·
Dú swere·
were·
min bitter tot·
vil svͤsse
bvͤsse·
mir den pin·

Nv sich
an mich·
troͤsterinne·
din minne·
die sinne·
hat mir also hin genomen·
dc ich ir gar·
sten leider bar·
Dur dich·
wil ich·
leben dar inne·
beginne·
gewinne·
der froͤiden mir la wider komen·
dc truren schar·
hin balde var·

So wolde ich froͤlich singen·
den kinden disen reigen·
Tanzen lachen springen·
bi pfaffen vnd bi leigen·

Ich moͤhte·
toͤhte·
mir min sanc·
noch mere han gemachet·
von ir
dú mir
tůt froͤide kranc·
vnd mine sinne swachet·

Ich sage·
die klage·
dien frúnden min
die mvgen dc alle schowen·
Dc nie·
vervie·
min langer pin·
gegen miner lieben frǒwen·

Nv wende·
vol ende·
vnd swende·
die not·
des war ald ich verdirbe·
Ich dvlde·
an schulde·
nach hulde·
den tot·
ob ich ir niht erwirbe·

Sol min singen·
mir niht bringen·
wol gelingen·
gůt gedingen·
ane twingen·
das lat úch erbarmen·
Min trost ist kleine·
frowe reine·
die ich meine·
froͤide erscheine·
mir alleine·
troͤste mich vil armen·

Got wolde·
ich solde·
an dien blanken armen·
Nach lone·
schone·
minnekliche ganze naht erwarmen·

So were·
vnmere·
swere·
mir vnd wolde ǒch von die armen·

Heýa nv hei·
geschiht
es niht·
so ist gar ein wiht·
min froͤide vnde mv̊s min herze enzwei·