Svmerlichú wunne

Svmerlichú wunne·
zieret wol den gruͤnen plan·
berg vnd tal· sint bekleit·
nach dem tǒwe svnne·
meijen disú kleider sneit
svnder wan· vber al·
swer wil bla rot gruͤn gel schowen·
vf dem anger in den ǒwen·
der siht da wunnen vil·
Minne twinget^{[WS 1]} mir den sin·
wiblich guͤte· min gemuͤte zuket hin·

Swie vil meije bringet·
froͤiden vnd sin liehten tage·
doch trure ich von der not·
dc mich minne twinget·
vnd der lieben mvnt so rot·
dest min klage· sicherlich·
ich han ir den mv̊t erzeiget·
dc sich ir gebot neiget·
alse min gir· svnder wan·
Minne twinget mir den sin·
wiblich guͤte· min gemuͤte zuket hin·^{[WS 2]}

Mir ist wol ze mv̊te·
swenne ich die vil^{[WS 3]} lieben sihe·
alle zit dvr dc iar·
dú vil reiie gv̊te·
tv̊t mich truren dc ist war·
ich vergihe svnder strit
so si tůt· der not geliche·
sam ich^{[WS 4]} trure herzekliche^{[WS 5]}·
sost min mv̊t· froͤiden fri·
Minne twinget mir den sin·
wiblich guͤte· min gemuͤte zuket hin·^{[WS 6]}

Lieb la liebe werben·
lieblich zwischent mir vnd dir·
lieb la mich liep dir sin·
la lieb niht verderben·
liep vnd tv̊ mir helfe schin·
frowe mir· minneklich·
ich bin ir so gar gebvnden·
dú mich twinget zallen stvnden·
dc si mir niht den sin·
Minne· twinget mir den sin·
wiblich guͤte· min gemuͤte zuket hin·^{[WS 7]}

Zvht vnd ellú schoͤne·
hat min frowe ach selig wip·
wiblich scham ǒch da bi·
fúrbas ich si kroͤne·
sist vor missewende vri
lieben lip ob alsam^{[WS 8]}

Anmerkungen (Wikisource)

1. Vorlage: twinge.
2. Vorlage: Mīne twinget· ⁊c̾·
3. Vorlage: vl.
4. Vorlage: ſā.
5. Vorlage: h̾zeklich.
6. Vorlage: Mīne twinget mir den· ⁊c̾·
7. Vorlage: Mīne· twin·
8. Diese Strophe ist unvollständig.