Svmer wunne
[88r]
Svmer wunne· so dv dine liehten tage erglentzen wilt·
wc kan in der welte danne húgelicher sin·
Vnd dú svnne· dringet liehten meien dvr der gruͤnen schilt·
der von lobe schatten birt dien kleinen vogellin·
dv́ dar vnder singent froͤideriche doͤne·
so gedenke ich heia hei wer hie bi mir dú schoͤne·
der ich vil gedienet han bi miner zit so wurde ich fro·
ia richer got von himele wan gienge es húre also·
Die gedanke· nach der lieben hoͤhent dike mir den mv̊t·
toren reht ist vil gewúnschen des er niht enhat·
dc sint kranke· froͤide bar vnd sint doch vnderwilent gv̊t·
manic man gedenket dike dar sin herze stat·
ich gedenke dike vnd wúnsche dc dú svͤsse·
minen senden kvmber den ich dur si lide bvͤsse·
der ich vil gedienet han bi miner zit so wurde ich fro·
ia richer got von himele wan gienge es húre also·[WS 1]
Towig rose· gegen der svnnen dú sich vs ir belgelin·
hat zerspreitet stant die wissen lilien nahe bi·
dú vil lose· hat mit gvͤte dirre zweier blv̊men schin·
an ir libe vnd ist aller missewende vri·
wan mac si wol nennen zv̊ dem wunsche gegen dem grale·
so gedenke ich alles lieb wer hie dú liehte gemale·
Der ich vil gedienet han bi miner zit so wurde ich fro·
ia richer got von himele wan gienge es húre also·[WS 2]
Frowe ich bin· din eigen diener iemer sit da her gewesen·
sit ich die vil min sit da her gewesen·
sit ich die vil minneklichen sach so wol gestalt·
miner sin· der hat ir lip vor allen vrowen vs erlesen·
es enwart an tvgenden nien hein wib zv̊ zir gezalt·
liese si mich dienstes vnd trúwen noch geniessen·
der mich beider gegen der lieben niemer wil verdriessen·
Der ich vil gedienet han bi miner zit so wurde ich fro·
ia richer got von himele wan gienge es húre also·[WS 3]
Dv́ vil reine· seldebere der ich eigen diener bin·
dú ist gar an allen wandel ganzer tvgende vol·
wan ein kleine· das besweret leider dike mir den sin·
si ist gegen miner bet ze strenge dc bevinde ich wol·
nv beginnet maniger sprechen dc tv̊t si mit eren·
dc sint schalke dar an sol dú liebe sich niht keren·
Der ich vil gedienet han bi miner zit so wurde ich fro·
ia richer got von himele wan gienge es húre also·[WS 4]