Svmer wil vns aber bringen
[89v]
Svmer wil vns aber bringen·
gruͤnen walt vnd vogel singen·
anger hat an blv̊men kleit·
berg vnd tal in allen landen·
sint erlost vs winters banden·
heide rote rosen treit·
sich froͤit al dú werlt gemeine·
nieman truret wan ich eine·
sit mir dv́ vil svͤsse reine·
frúmt so manig herzeleit·
Swer vil dienet ane lon·
mit gesange tůt ers lange·
der verlúret manigen don·
ICh wil al den lúten kúnden·
dc si lebt mit grôssen sv́nden·
der ich ie was vndertan·
die si hat an mir verschuldet·
sit min herze kvmber dvldet·
des wil si sich niht entstan·
wie mag si die súnde buͤssen·
mir wart nie ein lieblich gruͤssen·
da von wir vns scheiden mvͤssen·
ich wil vrlob von ir han·
Swer vil dienet ane lon·
mit gesange tůt ers lange·
der verlúret manigen don·[WS 1]
Frowe dú mir vor in allen·
wilent mvͤste wol gevallen·
noch vernemt ein liedelin·
ir sint ane lǒgen schoͤne·
doch ist schoͤne dike hoͤne·
dc ist leider an ú schin·
nv wil ich min singen keren·
an ein wib dú tugende leren·
kan vnd alle froͤide me dú nigende leren·
kan vnd alle froͤide meren·
seht der diener wil ich sin·
Swer vil dienet ane lon·
mit gesange tůt ers lange·
der verlúret manigen don·[WS 2]
Werdú minne ich wil dich strafen·
dv bist gegen mir harte entslafen·
sit ich struhte in dinú bant·
ich bin diner wibe ein tore·
min sang gat dir fúr din ore·
diner helfe ich nie bevant·
hilf ich bin mit spilnden ǒgen·
wunt ins herze svnder lǒgen·
dc tet mir ein wib so tǒgen·
an der ist wol dienst bewant·
Swer vil dienet ane lon·
mit gesange tůt ers lange·
der verlúret manigen don·[WS 3]
Minne heile mine wunden·
die mir in vil kvrzen stvnden·
von der strale din geschach·
mich hat ob zwein liehten wangen·
sere ir ǒgen blic gevangen·
ach was ich dar vnder sach·
ein roten mvnt von roͤte brinnen·
dc betwanc mich in dien sinnen·
dc ich si mv̊s iemer minnen·
ir blik mir dvr min herze brach·
Swer vil dienet lange zit·
ist sin frowe in tvgenden schowe·
wissent dc si lon im git·