Svmer diner lieben kúnfte (Mit aufgelösten Abbreviaturen)

Svmer diner lieben kúnfte·
bin ich fro dv hast gewalt·
diner hohen sigenv́nfte·
froͤit sich anger vnd der walt·
In dem walde hoͤrt man singen·
kleine vogelin sv̊sse erklingen·
vf dem anger schone entspringen·
siht man blv̊men manicvalt·
Dv́ zit wart nie so wol gezieret·
ich han des meien blv̊t ertwieret·
die wil ich prisen^{[WS 1]} mit gesange·
swie doch min kvmber wert ze lange·
ich bin tvmb dc ich min langes leit den lúten kv́nde·
manger sprichet seht dest war es wigt in harte ringe·
ich wer sicherlichen tot wan dc mich nert gedinge·
dc ich noch den kvmber min ze liebem ende bringe·
Sol ich iemer fro bestan·
so minne vnd dv́ vil minnekliche mich von sorgen lan·

Liehte^{[WS 2]} blv̊men zit des meien·
vogel singen hilfet niht·
sihe ich tanzen vnd reijen·
swes dú werlt ze froͤiden giht·
doch so trurent mir die sinne·
vngemvͤte wont mir inne·
sit mir von der svͤssen minne·
weder lieb noch trost geschiht·
Mich hat der wessen minne strale·
verwundet niht zem ersten male·
der alte kvmber hat mich sere·
verwunt wc sol dv́ rede nv mere·
minne wil ir alten vngenade an mir nv núwe·
ich gelebte nie so gar in kvmberlichen rúwen·
si wil mir in sendem herzen grosse sorge brúwen·
der ich ie getrúwe was dv́ wil mir niht getrúwen·
Sol ich iemer fro bestan·
so minne vnd dv́ vil minnekliche mich von sorgen lan·^{[WS 3]}

Mich nimt wunder ob dú reine·
hab gesetzet in ir mv̊t·
dc si mich in herzen meine·
sam si mit den ǒgen tůt·
seht so mv̊s ich gar verderben·
moͤht ich lieben blik erwerben·
dar nach in ir gruͤsse sterben·
so wer doch dc ende gůt·
si smehet mich mit liehten ǒgen·
wer ich ir in ir herzen tǒgen·
so mvͤsten ǒgen nach dem herze·
mir bvͤssen kvmberlichen smerzen·
den ich nv vil lange han von svs getanen sachen·
dv́ vil liebe wolte mir ze froͤiden nie gelachen·
doch mv̊s ich ir mit gedanke nahtes dike erwachen·
dc man moͤhte hoͤren mir dc herze vs iamer krachen·
Sol ich iemer fro bestan·
so minne vnd dv́ vil minnekliche mich von sorgen lan·^{[WS 4]}
Swa man minnekliche lachet·
hat da minne niht gewalt·
so ist ir hoher pris verswachet·
sol si da sin abe gezalt·
wan mag wol an miner frowen·
minnekliches lachen schǒwen·
ist dv́ minne an ir verhowen·
so ist si doch dar nach gestalt·
swer ir vil liehten ǒgen sehe·
wie der nach minem sinne iehe·
dú schone hat vil hohgemvͤte·
kv́sche vnd rehte wibes gvͤte·
in gesach nie schoner wib vnde also wol gebaren·
in gesach so roten mvnt bi allen mine iaren·
in gesach nie wibes lip so reinen vnd so claren·
doch kan si wol mit geberden· mannes herzen varen·
Sol ich iemer fro bestan·
so minne vnd dv́ vil minnekliche mich von sorgen lan·^{[WS 5]}

Ob dú liebe fúrhtet súnde·
dem tv̊t si doch niht gelich·
hat si gv̊ter lúte kv́nde·
die sint mit ir sv́nden rich·
dc si ir niht gebent ze bv̊sse·
dc si mvͤste mir vil sv̊sse·
lachen vnd in liebem grůsse·
gegen mir nîgen minneklich·
ir bihter hant niht rehter sinne·
si geltent minne mit vnminne·
so wirt der sv́nde deste mere·
si solten wisen rehte lere·
ob si mir ir grůs verseit der ich han wol gesprochen·
sa zehant wirt minne mit vnminne an mir gerochen·
si hat an getrúwem frúnde trúwe gar zerbrochen·
da von ist min hoher mv̊t in leide gar betrochen·
Sol ich iemer fro bestan·
so minne vnd dv́ vil minnekliche mich von sorgen lan··^{[WS 6]}

Anmerkungen (Wikisource)

1. Vorlage: bꝛiſen.
2. Vorlage: Lehte.
3. Vorlage: Sol ich iemer·
4. Vorlage: Sol ich iemer fro beſtā.
5. Vorlage: Sol ich iemer fro beſtan·
6. Vorlage: Sol ich·