Svmer der wil aber komen schone

Svmer der wil aber komen schone·
heide vnd anger stent geblvͤmet^{[WS 1]} vber al·
vogel singent in vil svͤzem done·
vor in allen doͤnet wol dú nahtegal·
wc singe ich tvmber von der gruͤnen heide·
wan klage ich sorge niht vnd swere beide·
die mir min vro minne git ze lone·
ich dien ir vnd ist ir dank doch gegen mir smal·

Minne hat wol an mir erzeiget·
dc si wunder schaffet an ir dienest man·
si hat mir dc herze dar geneiget·
da min dienest leider niht vervahen kan·
hei svͤze minne twing die minneklichen·
als dv tv̊st mich so mv̊s mir sorge entwichen·
minne sit din kraft so hohe reiget·
fuͤge ǒch dc dú liebe dir werde vndertan·

We wc vlehe ich tvmber nv die minne·
sit dc si ist vngenaden gegen mir vol·
si lat mines herzen kv́niginne·
vri da von ich sender grossen kvmber dol·
wc danne ich wil doh der vil lieben singen·
vnd wil ir minen kvmber zoren bringen·
doch vrewe ich mich des in minem sinne·
dc gewalt ein teil genaden haben sol·

Es ist lang dc ich der seldenberen·
niht ensach da von so truret mit der mv̊t·
sol dú vroͤmde mich gegen ir vnmeren·
des getruwe ich niht si ist so rehte gv̊t·
wa wart ie wib so rein so tvgentriche·
so gv̊t so stete so schoͤne so minnekliche·
hulfe si mir von den sweren
so wer ich von sorgen frowe min das tůt·

Selig wib ich hat ein vri gemvͤte·
nv bin ich din ledig eigen worden gar·
dc hat mir getan din wiblich gvͤte·
dú mich von dir niht lat wenken hin noh dar·
doch froͤwe ich mich dc ich so reinem wibe·
mih han gegeben· mit herzen vnd mit libe·
selig vrowe dc úch got behuͤte·
troͤstent mich so bin ich aller sorgen bar·

Anmerkungen (Wikisource)

1. Vorlage: geblvͤt.