Svmer d̾ wil ab̾ komē ſchone
[362v]
Svmer d̾ wil ab̾ komē ſchone·
heide vn̄ ang̾ ſtent geblvͤmet[WS 1] vber al·
vogel ſīgent ī vil ſvͤzem done·
voꝛ ī allē doͤnet wol dú nahtegal·
wc ſinge ich tvmb̾ vō d̾ gruͤnē heide·
wā klage ich ſoꝛge niht vn̄ ſw̾e beide·
die mir mī vꝛo mīne git ze lone·
ich dien ir vn̄ iſt ir dank doch gegē mir ſmal·
Mīne hat wol an mir erzeiget·
dc ſi wūder ſchaffet an ir dieneſt mā·
ſi hat mir dc h̾ze dar geneiget·
da mī dieneſt leid̾ niht v̾vahen kan·
hei ſvͤze mīne twing die mīneklichē·
als dv tv̊ſt mich ſo mv̊ſ mir ſoꝛge entwichē·
mīne ſit dī kraft ſo hohe reiget·
fuͤge ǒch dc dú liebe dir w̾de vnd̾tan·
We wc vlehe ich tvmb̾ nv die mīne·
ſit dc ſi iſt vngenadē gegē mir vol·
ſi lat mineſ h̾zen kv́nigīne·
vꝛi da vō ich ſend̾ groſſē kvmb̾ dol·
wc dāne ich wil doh der vil liebē ſingē·
vn̄ wil ir minē kv̄ber zoꝛen bꝛingē·
doch vꝛewe ich mich deſ ī minē ſinne·
dc gewalt ein teil genadē haben ſol·
Es iſt lang dc ich d̾ ſeldēb̾en·
niht enſach da vō ſo truret mit d̾ mv̊t·
ſol dú vꝛoͤmde mich gegē ir vnm̾en·
des getruwe ich niht ſi iſt ſo rehte gv̊t·
wa wart ie wib ſo rein ſo tvgentriche·
ſo gv̊t ſo ſtete ſo ſchoͤne ſo mīnekliche·
hulfe ſi mir vō den ſw̾en
ſo wer ich vō ſoꝛgē frowe min das tůt·
Selig wib ich hat eī vꝛi gemvͤte·
nv bin ich din ledig eigē woꝛden gar·
dc hat mir getan din wiblich gvͤte·
dú mich vō dir niht lat wenkē hin noh dar·
doch froͤwe ich mich dc ich ſo reinē wibe·
mih han gegebē· mit h̾zen vn̄ mit libe·
ſelig vꝛowe dc úch got behuͤte·
troͤſtēt mich ſo bī ich aller ſoꝛgē bar·
Anmerkungen (Wikisource)
- ↑ Vorlage: geblvͤt.