Sich froͤit der svͤssen svmerzit
[343]
SIch froͤit der svͤssen svmerzit·
erde vnd luft vnd swc dú beidú bernde sint·
ich tet also wan dc mir lit·
ein leit so nahe da von mir vreude gar verswint·
owe dc mich dú liebe des niht ane tůt·
vnd ich ir mine besten tage·
mit stete her gedienet han·
nv hoͤre ich doch iehen des si si so gůt·
wan neigte si min hohe klage·
so dc si eine gvnde mir dc ich ir diente vf lieben wan·
Mit stetem mv̊te vnd ane wank·
sol man zerehte steten wiben dienen sol[WS 1]
so hab ich der gv̊ten ane dank·
was dar vmbe si mac mich noch wol
von senden sorgen scheiden· si vil selig wib
die ich nach svͤsser liebe habe·
dú mich alleine mag gewern·
ir hohe werendú[WS 2] tvgent ir minneklicher lib·
kvmt mir min langer kvmber abe·
ich wirde selher froͤidenrich der tusent herzen mehten gern·
Wil mich dú herzeliebe niht·
ir gvͤte lan geniessen der si wunder hat·
dvr wc solde ich danne ahten iht·
wies vf der heide an svmer liehter wunne stat·
ir rosevarwer mvnt ir minneklicher grůs·
mak mir vil mere froͤide geben·
danne al der vogel svͤsser sang·
wc sol ich sagen wirt mir von ir niht swere bůs·
so endert sich leben·
vnd ist dú zv̊uersiht da hin dar vf ich ie nah froͤiden rank·