Selderiche selig wib

Selderiche selig wib·
wie dv lerest herzeliebe wider leben·
sêl vroͤide herze lib·
hat ich einem wibe in ir gewalt gegeben·
bin ich da besweret we wie sol ich dc gesagen·
da wil ichs allerest gotte vnd dar nach alder werlte klagen·

Minneklich gebaren wil·
mich verderben dc ich an der gv̊ten sach·
dc ir schoͤne ie wart so vil·
dc hat mir gemachet swere vnd vngemach·
doch hat mich behabet an liebem wane noch der wan·
dc nieman gros lieb enmag an vnderwilent leit gehan·

Svͤzer froͤide ich was gewenet·
wol im der mich alse sv̊ze wider wenet·
des mv̊t werde also versenet·
als sere sich dvr not der mine froͤlich sene·
vnd gvͤtlich sprechen mvͤze mir geben·
trost der troͤste mich en zit· wan anders mv̊s ich senende leben·

Alder welte nieman kan·
so gebaren dc si alle dvnke gůt·
dvr wc neme ich mich des an·
dc nieman getet noh niemer me getv̊t·
ich were in der maze des mich duhte wol gevarn·
moͤht ich zv̊ der meisten menge miner vůge mich gesharn·

Was sol singen oder sagen·
alder iht des hohem mv̊te wol gezimet·
ich solde anders mich beiagen·
sit es nieman war nah sinem werde nimet·
het aber es dú werde hohgemv̊te aleine wert·
so wêr alles dc geschehen daran des mir min herze gert·

Klage ich mine sende klage·
dú mich twinget vnd ie herzekliche twang·
mit der klage ich niht beiage·
noh beiagte nie wan smehen dank·
sol ich also mit leide vf lieb gedinge leben·
so mag mir dú liebe ir trost vil schiere vnschedelichen geben·

Selig wile selig zit·
selig alles dc der svͤzen stunt geschach·
do si dv mir selde git·
ein so svͤze selig wort ze mir gesprach·
dc mich iemer werdeklicher froͤide hoͤhen mv̊s·
ǒch nige ich ir willekliche wirt mir statte vnz vf den fůs·