Selderiche ſelig wib

Selderiche ſelig wib·
wie dv lereſt h̾zeliebe wid̾ leben·
ſêl vꝛoͤide h̾ze lib·
hat ich einē wibe in ir gewalt gegebē·
bin ich da beſw̾et we wie ſol ich dc geſagē·
da wil ichs allereſt gotte vn̄ dar nach ald̾ w̾lte klagen·

Mīneklich gebarē wil·
mich v̾derbē dc ich an d̾ gv̊tē ſach·
dc ir ſchoͤne ie wart ſo vil·
dc hat mir gemachet ſw̾e vn̄ vngemach·
doch hat mich behabet an liebē wane noch d̾ wan·
dc niemā groſ lieb enmag an vnderwilēt leit gehan·

Svͤzer froͤide ich was gewenet·
wol im der mich alſe ſv̊ze wid̾ wenet·
deſ mv̊t w̾de alſo v̾ſenet·
als ſere ſich dvr not d̾ mine froͤlich ſene·
vn̄ gvͤtlich ſpꝛechē mvͤze mir gebē·
troſt d̾ troͤſte mich en zit· wā and̾s mv̊s ich ſenēde lebē·

Ald̾ welte niemā kan·
ſo gebarē dc ſi alle dvnke gůt·
dvr wc neme ich mich des an·
dc niemā getet noh niemer me getv̊t·
ich w̾e in d̾ maze des mich duhte wol gevarn·
moͤht ich zv̊ d̾ meiſtē mēge miner vůge mich geſharn·

Was ſol ſingē oder ſagē·
ald̾ iht deſ hohē mv̊te wol gezimet·
ich ſolde anders mich beiagē·
ſit es niemā war nah ſinē w̾de nimet·
het ab̾ es dú w̾de hohgemv̊te aleine w̾t·
ſo wêr alles dc geſchehē daran des mir min h̾ze gert·

Klage ich mine ſende klage·
dú mich twinget vn̄ ie h̾zekliche twang·
mit d̾ klage ich niht beiage·
noh beiagte nie wan ſmehē dank·
ſol ich alſo mit leide vf lieb gedinge leben·
ſo mag mir dú liebe ir troſt vil ſchiere vnſchedelichē gebē·

Selig wile ſelig zit·
ſelig alles dc der ſvͤzen ſtunt geſchach·
do ſi dv mir ſelde git·
eī ſo ſvͤze ſelig woꝛt ze mir geſpꝛach·
dc mich iem̾ w̾deklich̾ froͤide hoͤhē mv̊s·
ǒch nige ich ir willekliche wirt mir ſtatte vnz vf den fůs·