Item die Gorssen han den andern teyl des lochs yn da das heylig Kruz gestanden hat und das halb teyl da das heylig Kruz gefunden ist worden und han iren Chor hinder dem berck Kalvarie und halten den Krystischen Glauben und synd dem Babest ungehorsam und glauben doch an Christum und an dy Aposteln.
Item die Jacobiten han die Kappeln hynder dem heyligen Grab yn darin sy iren Chor halden und glauben an Got aber nit daß er von dem Vater geborn sey worden, oder empfangen von dem heyligen Geist, oder erstanden sey von dem todt und synd dem Babest ungehorsam.
Item die Surianen handt unter dem gewelb hinter den Jacobiten ein Kapell da sy yern Chor halden und gelauben an Got, aber nit an Christum und sind dem Babest ungehorsam.
Item die Nostronomiten han ein Chor vor unser lieben frauen Capelle darin eyn Altar und glauben an Christus, und seyn dem Babest ungehorsam und halden vil underscheyd in dem glauben, darumb man sy nit fur gut Christen halt und waren uff dyse zyt nit da.
Item die Griechen han den rechten Chor yn und halden Sandt Paulus Glauben und glauben an Christum und an dy Apostel, aber sy halden underscheydt in dem glauben und sindt dem Babest ungehorsam, und in der mit in irem Chor da stet eyn spitzet stein, hat oben eyn loch und ist dy stet da Got der Herr gesprochen hat, dyß ist mitten in der Welt.
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 70. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/22&oldid=- (Version vom 1.9.2023)
