Anna fruchtpar solt werden, da ist aplas syben etc. und bliben lygen byß nach mitternacht und darnach sassen mir wyder uff dy esell und ritten uff suntagk zu morgen nach vyncula Petri und komen gen Bethania da gingen mir in Sandt Maria Magdalena huß das ist ein zubrochen Kirch, da is aplas von pyn und scholt, darnach gengen mir zu dem huß Sandt Martha ist auch ein zubrochen Kirch da ist aplas syben etc. Darnach nit ferr davon weyst man uns dy stat da Got der Herr uffgesessen hat und Martha zu ym sprach, o Herr werstu hie gewesen, fo wär myn bruder Lasaro nit gestorben, da ist aplas syben etc. darnach gengen mir zu dem Grab Lasarus und sahen dy stat, da Got der Herr gestanden hat, da er Lasarus von dem todt erweckt, da ist aplas syben etc. und bey dem Grab Lasarus is aplas von peyn und von scholt, und han dy Kirchen dy heyden ynn, darnach furet man uns zu dem huß Simon des Aussezigen den Got der Herr rein gemacht hat und Maria Magdalena Got dem Herrn sein Füeß gesalbet hat und mit yerm har gedrücket hat, und ist ein zubrochen Kirch und ist aplaß syben etc. darnach rytten mir gen Jerusalem das mir zu der Mess da waren, darnach des abent um die 6. ur, ließ man uns wyder in den Tempel, da gingen etliche Bilgerym zu den heylgen steten den aplaß zu besuchen und nach mitternacht huben die herrn an Meß zu lesen, des morgens um die neun ur sang man eyn Ambt von dem heyligen ostertagk. Item so seyn dyß dy glauben die in dem Tempel gehalden werden.
Zu dem ersten die Barfosser han das heylig Grab yn und ein Capelle unser lieben Frauen und ein Altar uff dem bergk Kalvarie und das loch halp da das Kruz yn gestanden hat und han dy halp stat yn, da das heylig Kruz funden ist worden.
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 69. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/21&oldid=- (Version vom 1.9.2023)
