des Mitwochen nach vynculi Petri zu abent gengen mir wyder in den Tempel und ein ycklicher Bylgerim besucht die heyligen stet und lost den aplas, und nach mitternacht huben dy herren an Meß zu lesen, das wert biß an den tagk, da hub man wyder ein Ambt an, und wardt gesungen uff dem berck Kalvarie von Sandt Petern, darnach gengen mir wyder uß dem tempel ycklicher zu essen uff freytagk gegen dem abent sassen mir uff die esell und ryten biß gen Bethania und bliben lygen in dem feldt biß gen mitternacht, da sassen mir wyder uff und ritten dy nacht das mir des morgens umb 8. ur an dem Jordan worden, daselbst ist dy stat da Got der Herr von Sandt Johannsen getauft ist worden, und da patten und assen dy Bilgerym und daselbst ist aplas von peyn und scholt, darnach sassen mir wyder uff dy esell und rytten bey das huß da Sandt Johanns weyst uff Christus und sprach furwarn das ist das Lamb Gotes, darnach ritten mir durch Iericho und ist die stat da Got der Herr geladen wardt von Zacheo, da ist aplas syben etc. Darnach komen mir an den berck Quarantana und unden stunden mir ab und gengen den berck biß an dy mit stet ein Kapelle in dem felß da hat unser Herr Got dy viertzig tagk gefast, da ist aplas von peyn und von scholt, und oben uff dem berck stet ein zubrochen Kapelle uff der stat da der Tuffel Got den Herrn versucht hat, da ist aplas syben etc. und man weyst uns auch das todt Mer da dy funff stet under seyn gangen, Sodoma und Gomorra, darnach gegen dem abent sassen mir wyder uff dy esell und rytten gen terra rossa und ist ein zuprochen stat und ist dy stat da Joachim unser Frauen Vatter war gangen zu seinen Schaffen als er zu Jerusalem in dem Tempel verspot wardt, das Anna nit fruchtpar solt seyn und ym der Engel verkundt das er wyder zu huß solt gen und das
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 68. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/20&oldid=- (Version vom 1.9.2023)
