da Got der Herr nach seiner gepurt in gelegt ist worden vor den esel und das ryndt uff dy heyligen Christnacht, da ist aplas von peyn und scholt nach mitternacht huben die herrn an Meß zu lesen uff dem Altar von der gepurt Christi und uff dem Altar vor der Krippen und uff dem Altar vor der Beschneidung Christi und uff dem Altar der unschuldigen Kindlein und uff dem Grab Sandt Ieronymus und das wert bys uff den dagk, darnach ward ein Ambt angefangen und gesungen uff dem Altar von der gepurt Christi und ward gesungen von der gepurt Christi, nach dem Ambt saßen mir uff dy esell und ritten zu dem Huß Zacharias das sind zwo zubrochen Kerchen, und stet eine uff der andern, und in der obristen Kirchen ist die stat da Maria zu Elisabeth ging über das gepirg und grüst sy und lobgesangk macht magnificat anima mea Dominum, da ist aplas syben etc. und ist auch dy stat als Zacharias schreyb das sein Sun Johannes solt haysen, darnach gengen mir in dy underist Kirchen, da stet ein stein in der Mur da Herodes dy unschuldigen Kinder ließ totten und suechet Sandt Johannes, da legt Sandt Elisabeth das Kind uff den stein, da tet sich der stein uff, und verparg das Kind, da ist aplas syben etc. darnach gengen mir herab nit fast hoch in eyn Kirch uff ein andern berck und neben dem Altar uff dy lencken hand in einem besundern gewelb, da stet ein Altar da Sandt Iohannes baptista geporn ist worden, da ist aplas von peyn und scholt und diß paydhuß Kerchen sind gewesen Zacharias huser und sind zerstort und wonen Heyden darin, darnach komen mir zu einer Kirchen genant zu dem heyligen Kruz, in und under dem hohen Altar stet ein loch da der baum gewachsen ift, da das heylig Kruz außgemacht wardt und weyst man uns auch ein handt von Sandt Barbara und ist aplas etc. und komen umb Vesper zyt wyder gen Jerusalem,
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 67. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/19&oldid=- (Version vom 1.9.2023)
