han dy Heyden abgeprochen, da ist aplas von peyn und scholt, darnach gyngen mir mit der process herab in den Kruzgangk, da stet ein Kapell uff der stat darin die Aposteln sich versamelt hatten nach Christus todt, und Jesus zu yn kom mit beschlossener Thür, und als Sandt Thoman der uffersteung nit glauben wolt, er leget denn seyn Finger in dy seytten also kom Jesus am achten tag wyder und sprach zu Sandt Thomaß kum her und leg den finger yn mein wunden, da ist aplas von peyn und von scholt und wurden dy Bylgerim geladen von den pruedern mit yn zu essen das dan also geschah und umb Vesper zyt sassen mir uff esell und rytten gen Bethlehem und da weyst dy pilgerym yn den Kruzgangk zu legen, und da schickten sich die prueder zu eyner process und dy Bylgerym yecklich ein prennende Kerzen, und gengen mit der process in den Kruzgangk und bliben da still sten und biß man gesang etzlich lobgesangk und Colecten und ward verkundt das loch da sandt Ieronymus dy Bybel zu Lateyn gemacht hat und daselbst ist aplaß syben etc. und hat Sandt Eusebio ach etlich Jar darin gelegen, ach ward uns verkundt das dy unschuldigen Kindlein ach ym eim loch dabey gelegen hatten, da ist aplas syben etc. und die process mag nit darinn, dann der leut waren zu vil, aber darnach ging eyn ycklicher darinn als dick er wolt, darnach gengen mir mit der process uff dem Kruzgang yn die Kyrchen uff dy recht handt neben dem Chor zu eynem Altar stet uff der stat da Jesus uff beschnitten ist worden, da ist aplaß von peyn und schold, darnach gengen mir uff dy lenck handt zu eym Altar, dy stat da sich dy heyligen drey Kunig berayten mit dem opfer Jesus zu pryngen, da ist aplaß syben etc. Darnach gengen mir zwelff stafflen dieff under sich in eyn Kroft und uff dy lenck handt stet ein Altar und unter dem Altar ist dy stat da Got der Herr geporn ist worden, da ist aplas von peyn und scholt, darnach uff dy recht handt under dem felß stet die Kripp
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 66. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/18&oldid=- (Version vom 1.9.2023)
