ist ein Kapelle, han die Gorssen yn, und da sieht man den ryß her abher get, darnach gengen mir forter zu der stat, da Got der Herr gesalbt ist worden, da man yn begraben wolt und ist die stat gezeichent mit stein eins manß leng, da ist aplaß von peyn und von scholden, darnach gengen mir mit der process zu dem heilgen grab da Got der herr yn gelegen hat und ist aplaß von peyn und scholdt und vor dem heyligen grab stet der stein daruff der Engel gestanden hat, der den dreyen Marigen am ostertagk verkundt, das Christus ufferstanden war, und dyß process ward gegangen mit stil Lobgesangk und Knytten an eyner yecklichen stat da der aplaß war, und es lang und dieff in dy nacht war, und nach mitternach huben dy prueder und herrn an Mess zu lesen, in dem heyligen grab und uff dem berck Calvarie und an andern enden und gaben den Bylgerim das heylig Sacrament und ward den morgen ein herlich ambt gesungen von dem heyligen Kruz uff dem berck Calvarie, und umb 8. uhr uff den tagk ließ man uns wyder uff dem tempel und saß der Rat von Jerusalem da vor, und fur dem tempel ist dy stat gezaychnet mit eym stein, da Got der Herr fiel mit dem Kruz, da ist aplaß syben etc. darnach gengen mir mit den pruedern yn das Kloster zu monte Syon, da sungen sy ein loblich ambt von dem heylgen geyst, darnach machten sy ein loblich process mit fast vil gesang, und weysten uns den hohen Altar under demselben ist die stat da unser Herr Got das abent essen gessen hat mit seinen zwelff Jüngern und das heylig Sacrament da auff gesazt und gemacht hat, da ist aplaß von peyn und von scholdt, darneben stet eyn Altar, auff der stat, hat unser Herr Got seinen Jüngern die Füss gewaschen, da ist aplaß syben etc. darnach gengen mir uff der Kerchen uff dy lenck handt 10. staffeln hoch, hinder der Kerchen ist dy stat, da der heylig geyst ist kumen zu unser lieben Frauen und den zwelff Aposteln uff den heylgen pfingstagk, da ist eyn Kapelle gewesen,
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 65. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/17&oldid=- (Version vom 1.9.2023)
