dy stat da das heylig Kruz bebent ist worden, da ist ein todter leichnam daruff gelegt worden, und ist wyder lebendig worden, und dy stat ist gezaichet mit einem roenden stein, und ist aplas syben etc. und in der Kapelle han wonung die Barfosser und als man mit der process wyder auß der Kapellen gieng weyst man uns dy stat da unser herr Got uffgestanden hat, uff den ostertagk und dy ander stat da Maria Magdalena uffgestanden hat, da ir Got der herr erscheyn uff den ostertagk in eins gertener weys und sind die zwo stet gezeichent mit zwayen roenden stein, und uff iecklicher stet ist aplas syben etc. Darnach gengen mir mit der process uff dy lincken handt, in ein klein Kroft, da stet ein Altar da Got der herr in gefangen ist gesessen, biß das man das loch da das Kruz solt sten gemacht hat, da ist aplas syben etc. Darnach gengen mir forter mit der process für ein Altar da ist dy stat da dy Juden umb Christus kleyder gespilt haben, da ist aplas syben etc. forter uff dy lenck handt wol umb 30 staffeln dieff, da ist Sandt Helena Kapelle, da ist aplas von peyn und von scholt. Darnach von derselben Kapelle wol forter hinab 7. staffeln dieff, da ist dy stat, da das heylig Kruz und die Kron und das Sper und dy Negel funden sind worden, an dem end ist aplaß von peyn und von scholdt, und so man wyder heruss get uff dy lenck handt, da stet eyn Altar, under dem Altar stet eyn stück von der sullen da Got der Herr wider gepunden ward, da er gekronet ward, und verspot hat yn Pilatus huß, daselbst ist aplas syben etc. darnach gengen mir aber furbaß uff dy lenck handt gein 18. staffeln hoch da ist der perck Calvarie und das loch da das heylig Kruz yn gestanden hat, da Got der Herr an gestorben ist, da ist aplas von peyn und scholt man sieht auch eyn grossen ryß in dem felß der gerissen ist, da Got der herr gestorben ist, umb dy stät ist ein schön Kapelle und ein Altar uff dy recht handt und dy Gorssen han das loch halp yn, und dy Barfosser das ander halp teyl, und an dem bergk
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 64. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/16&oldid=- (Version vom 1.9.2023)
