Aposteln und etlich der heimlichen Jongern yn verborgen lagen zu der zeit der Marter Christi, daselbst ist aplas syben etc. Darnach gengen mir den berck hinuff, da lag der Gotsacker der um die dreyssig pfennig gekauft ist worden, da Got der Herr um verkaufft ward und ist viereckig und oben gewelbt, und gen zehen Löcher darein und ligen die Armengen (Armenier) in begraben, daselbst ist aplas syben etc. Darnach gengen mir furter den berck hin uff gen monte Syon und als man den berck hinuff kumbt uff die recht handt da stet Kaiphas hauß ist ein Kirch, handt die Armengen yn außwenck der Maur, uff die recht Handt hat Sandt peter des erstenmal verlogent, darnach gengen mir in die Kirchen, weyst man uns den stein, der vor dem heyligen grab gelegen, und ist der hoch Altar und ist aplas syben etc. neben dem Altar uff die recht Handt stet der Kercher, ist fast eng und finster, darein Got der Herr gefangen ist gelegen, die weil die Juden zu Ratt gengen, daselbst ist aplas von peyn und scholt, darnach vor der Kerchen ist ein stein gemaurt in die Maur, daruff Got der Herr gestanden hat, da in Sant Peter verlogent, und mitten in dem Hoff ist die stat gezaichen, mit eynem steyn da Sandt peter zwie verlogent hat, und wann man wyder heruss get, an dem eck uff die recht Handt desselben Huß, da stuendt unser liebe Frau, und Maria Magdalena und sachen unsern Herrn heruß furen gepunden und gefangen, da ward unser Frau ammechtig, da ist aplas syben etc. und nit weyt davon uff dy recht Handt zeicht man uns dy stat, da Sant Johans unser lieben Frauen mess hat getan, daselbst ist aplas syben etc. und ist auch die stat, da unser liebe Frau nach Christus hymelfart 8. Jar gewohnt hat, und ist uff der stat gestorben, und ist aplas syben iar, von peyn und von scholden, darnach weyst man uns nahen darbey, da sandt Mathias zu eyn Apostel gekornt wardt, an Judas stat, daselbst ist aplas syben etc. darpey uff die lenck Handt gey Kaiphas Hauß ist die stat, da sy die Aposteln getaylt
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 62. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/14&oldid=- (Version vom 1.9.2023)
