darnach uff werters am olpergk komen mir zu eyner Stat da Jesus hat geweint über Jerusalem, schier uff der höch ist dy Stat dy da heist Galilea, da der Herr seinen Jüngern am Ostertagk erschein, da ist aplas syben iar und syben quadragena darnach gingen mir zu einer andern stat daselbst der Engel unser Frauen ein palmreiß pracht und verkundt ir iern todt und hymelfart, und das dy zwelfpoten dabey solten seyn, da ist aplas syben iar und syben quadragena darnach oben uff dem pergk ist ein zerbrochen Kirch darin ein klein Kapellelyn, daselbst mitten in dem Kapelleleyn ist ein weisser stein darin sieht man den rechten Fuß unsers Herrn, und ist der stein da Got der Herr uff ist gestanden, da er zu Hymel ist gefaren, daselbst ist aplas von pyn und scholt, darnach giengen mir den perck wider herab zu der stat da Jesus die zwelfpoten dy acht säligkeit gelernt hat, da ist aplaß syben Jar und syben quadragena, darnach dapey leyt ein zubrochen Kirch ist dy stat da dye zwelfpoten den gelauben gemacht haben, daselbst ist aplaß syben Jar und syben quadragena, darnach zu der stat da Jesus die zwelfpoten das pater noster gelernt hat, da ist aplaß syben iar und syben quadragena, darnach gingen mir zu der stat da unser Frau geruet hat, wann sy den olpergk uffging und dy heyligen stet zu besuchen, daselbst ist aplaß syben quadragena, darnach zu dem loch da der mynder (iunior) sandt Jacob yn verporgen hat, und nit essen wolt, es wer dann Got der Herr erstanden, und ist ein zuprochen Kapelle, da ist aplaß syben etc. Darnach gingen mir den perck wider hinuff da weist man uns der heyden tempel, und ist vorzeitten der tempel gewest darin unser lieben frau geopfert ward, und so langk darin peleyb byß sy Josep verdraut ward, da ist aplas von peyn und scholt, und die Heyden lassen niemant darein, darnach forters komen mir zu einem stein, leit an der strassen da Sandt peter nider gesessen hat nach der Verlocknuß Christi und seyn Sünd
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 60. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/12&oldid=- (Version vom 31.8.2023)
