worden, das hat zwo tur und gen dy Bilgerim dardurch, daselbst ist aplaß von pyn und von scholden und so man die staffeln wider heruff get in der mur, stet her Jochemß grab, uff die lencken handt dargegen über ist das grab Sandt Anna da mir wider uff der Kerchen gengen eyn wenig uff die lenck handt gen der stat zeigt man uns dy port Aurea, die man nent dy gulden pfort, da Jesus an dem heylgen palm tagk durch reytt und nach ym eyn herr Auterea genant, mit grosser macht und herlichkeit dardurch ach wolt reytten, das mocht er nyt getayn also stuend er ab, und gieng dyemutigklich dardurch darnach gieng die pfort wider zu, und man sagt die offnung stee zu dem almechtigen Got, daselbst ist aplaß von pyn und scholt und darnach gengen mir zu der Stat, daselbst Jesus seiner lyben mueter und mit seinen Jüngern redt von seiner marter und den dy auch verkundt, daselbst ist aplaß syben iar und syben quadragena, darnach ein wenig uff vertreß an dem ölperg get man unter ein felß daselbst Jesus sein gepet gesprochen hat zu seinem hymelischen Vater für sein marter und hat pluetigen schweiß geschwitzet, man sieht ach noch den stein da der engel ufgestanden hat der got dem Herrn erscheyn ist, da ist aplas von peyn und von scholt darnach gengen mir an die Stat da Jesus dy drey Jüngern sitzen ließ, als er an sein gepet ging, und sy zu dem drittenmal schlaffen fandt, da ist aplas syben iar und syben quadragena, dapey ist ach dy Stat da Got der Herr gefangen ward, und durch Judas verratten ward, daselbst is aplas syben iar und syben quadragena, darnach ein wenigk uff verters am Bergk weist man uns die Stat daselbst unser Frau zu Hymel gefaren ist, und dy Aposteln on Sandt Thomanß der war nit da, und nach irer uffart kom Sandt Thomas, und ein ieglicher sein gepet zu Got tett und Sand Thomas pat unser lieben frauen das sy ym ein zaychen ließ, da sant sy ym yern Gürtel zu bekentnuß, daselbst ist Aplas syben Jar und syben quadragena,
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 59. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/11&oldid=- (Version vom 31.8.2023)
