hat, da ist aplas syben iar und syben quadragena darnach forter furet man uns zu dem Huß Pilatus darin Jesus gepunden gegayselt gekronet und zu dem todt verurtaylt ward darin oder davor is aplas von pyn und scholt dabey uff die lencken handt ist das Huß Herodes darin Jesus auch gefuret is worden und ein wayßes kleydt ist angetan worden und verspot ist worden, da ist aplas syben iar und syben quadragena und in disen zweyn heusern wonen dy heyden darumb man nit darein mochte und an des Pilatus huß zeigt man unß das Dor dadurch Got der Herr mit dem Kruz uß gefuret ist worden und ist mit steinen zuegemacht, darnach zayt man uns Salamons tempel ist yez eyn heidennische Kirchen und so man den tempel umb genadt und aplaß willen ansicht so ist vergeben von pyn und von scholden und mag nit darin, wenn die heyden lassen nymant darein, darnach zeigt man uns eyn groß grub darin man vor zytten alle getier gewaschen hat so manß in den tempel opfern wolt, darnach gengen mir zu dem Dor uß der Stat und da man Sandt Steffan uff hat gefurt, also darnach komen mir zu der Stadt da Sandt Paulus stuendt und dy Kleyder hylt den dye Sandt Steffan verstaynten da bey ist dy Stat da man Sandt Steffan verstaynt hat, da ist aplaß syben iar und syben quadragena, darnach den Berck hin ab in dem tal Josaphat das man nent zu dem Bach Zedron ist ietzund ein steinen Brück darüber und da is der groß paum darüber gelegen daruß man das heylig Kruz gemacht hat und Sibilla die Kunigin nit darüber gen wolt, sunder in den geist erkant das der almechtig got an dem holtz leyden solt den todt, und fleust iärlich zwischen weynachten und ostern das wasser dardurch, da ist aplaß syben iar und syben quadragena darnach gengen wir zu dem tal Josaphat und komen zu eyner Kirchen wol 34 staffeln dief, daselbst unser frau in eynem klein Kapellelen begraben ist
Anonym: Reise Philipps des Jüngern nach dem heiligen Grabe. Ev. Luth. Waisenhaus, Hanau 1780, Seite 58. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Reise_Philipp_des_J%C3%BCngern.pdf/10&oldid=- (Version vom 31.8.2023)
