Seite:Pfaff Maerchen aus Lobenfeld.djvu/6

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

an der Wäschbricke e alt Mändl zu em kumme un hot en gfroogt: Bu, worum bisch dann so luschtig?

Ja worum soll ich a net luschtig seiⁿ? I hab drei Johr em Bauer gedient un alle Johr drei Heller krigt; worum soll i do net luschtig seiⁿ?

Do hots Mändl gsaat, er soll em en Heller gewwe. Do hot er em kaan gewwe wolle; aber des Mändl hot so aⁿghalte, dass erm en Heller gewwe hot. Do hot em des Mändl e Geigl gewwe: wann er geije täät, miest alles tanze.

Noch wie der Bu weiter gange un an de Steeg kummen isch, isch a noch so e Mändl kumme, hot en gfroogt, worum er so luschtig isch, un hot aⁿghalte um en Heller. Un wie der Bu a dem Mändl en Heller gewwe hot, hot em des Mändl e Flintl gschenkt, dass er alles was er schieße will trifft.

Noch am Bettelmannsplatz isch e dritt Mändl zu em kumme un hot em a ebbes gewwe for de dritte Heller, was es em awwer gewwe hot, waaß i nimme.

Noch isch der Bu widder zurick, durch de Spechbacher Wald widder Lofeld zu. Wie er de Spechbacher Buckel runner isch, isch en Judd zu em kumme, no sen se minanner gloffe bis an Lehmanns Wisse: do isch en Dornbusch gstanne, do isch en schener Vogl druf gsesse. Noch hot der Bu gsaat, wann der Judd de Vogl holle will, schießt er de Vogl tout. Des hot der Judd eiⁿgwilligt. Noch hot der Bu de Vogl gschosse un der Judd isch in Dornbusch neiⁿ un hot de Vogl holle wolle. Un wie der Judd drin gwest isch im Dornbusch, hot der Bu seiⁿ Geigl aⁿgleegt un hot der Judd tanze messe im Dornbusch drin. Noch hot er so lang fortgegǐje bis dem Judd seiⁿ Klader verrisse gwest sen un des Bluut isch an de Baaⁿ nunnergloffe: no hot er ufgheert.

Noch isch der Judd reiⁿ uf Lofeld zum Vogt un hot gsaat, der Bu häät en so gschlage un häät em seiⁿ Geld gnumme – des hot er awwer im Heckebusch verlore ghatt beim Tanze. No isch der Bu verurteilt worre an Galje. Der Galje hot in de Gäärte zu Lofeld gstanne.

Wie der Bu am Galje drowe uf de Later gestanne hot, no isch er gfragt worre, was er noch will: no hot er

Empfohlene Zitierweise:
Fridrich Pfaff: Märchen aus Lobenfeld (1896). Trübner, Straßburg 1896, Seite 67. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Pfaff_Maerchen_aus_Lobenfeld.djvu/6&oldid=- (Version vom 1.8.2018)