Hieronymus noster nunc in praelegendo multo quam antea dum tu aderas diligentior sit, multoque plura quam prius non tam doctissime quam fidelissime nobis communicet. Exposuit, ut opinor, jam decem Theocriti eclogas non sine summa sua laude. Sed ut tibi verum fatear, non tam ego quam ceteri, mallem potius linguam communem ut doceret, quam Doricam illam scabram certe et subrusticam, tametsi rei rusticae alioqui accomodatissimam. At deus bone, quantum tibi si adesses, iucunditatis afferret? O quoties te votis ad nos voco citoque. Vale prosperrime. Ex Parrhisiis. VIII idus Novembr.
Henricus Bebelius Justingensis Poeta Laureatus
Mich. Humelbergio Ravenspurgensi S. d.
Pridie quam tuus ad nos pater venit vir humanissime literae tuae ad me sunt delatae bibliophori cuiusdam negligentia diutius in Alpibus nostris Suevicis detentae: illas quam obviis manibus et hilare acceperim, quam tibi Sueviaeque nostrae sim gratulatus, quamque in amorem tui mirum sim in modum accensus, epistolaris angustia explicare non patitur. Verum satis superque testimonio illius rei tibi erit parens tuus charissimus, in quibus quidem literis relucet eruditio quaedam non vulgaris et exposita, sed rara et exquisita, summo dicendi artificio acrimoniaeque coniuncta. Addo graecas literas adeo latinis sententiis quadrantes, illarumque quasi vernaculam scribendi artem, ut ego quas vix primis labris attigi illarum nullam mentionem apud te audeam facere me hercule. Tu perge ut coepisti et in amicitia nostra cui liberaliter respondebo et in literis illis musicis, cogitaque te non tam ad propriam quam communem patriae salutem atque ornamentum natum, ut vel sero tandem Suevia nostra ab omni injuria oblivionis, ruditatis atque scriptorum malignitate vindicetur. De his alias plura. Nunc mihi iucundius nihil afferre potuisti atque denuntiare, quam Hieronymi Aleandri Germani eruditionis multiiugae gloriam et amplitudinem, eiusque bonam et honestam de me opinionem
Adalbert Horawitz: Michael Hummelberger. Eine biographische Skizze. S. Calvary & Co., Berlin 1875, Seite 35. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Michael_Hummelberger._Eine_biographische_Skizze.djvu/35&oldid=- (Version vom 1.8.2018)
