weiter davon fleusst der Fluß / die Schunter genant / so es eins theils mit dem Ampt Campen vnterscheidet / hat viel Eichen / wie auch reich Vnterholtzung / so das Hauß aller Orten vmbher vmbgeben.
Was sonsten von dieses Hauses vnd Ampts Brunsrode vor alters gewesenem Zustande berichtet wird / daß vor Erbauung der Statt Braunschweig / vff solchem Hause Brunsrode / die regierende Hertzogen zu Braunschweig Lüneburg residirt / vnd zu Zeiten Hoff gehalten haben / daher noch ein Ort gezeiget wird / welches genant der Thiergarte / vnd ein ander Ort der Ziegelhoff / davon weiß man zwar keine vmbständliche Gewißheit / doch ist so viel offenbahr / daß es ein sehr alt Hauß seyn muß / so in der Statt Braunschweig Stattbüchern noch in so weit befindlich / wie dieselbe Statt daher beschrieben / daß Sie erbawet vnd belegen 2. Meil von Brunnrode.
Ist ein Fürstl. Braunschweig- Lünenburg- Calenbergisch Ampthauß / vnweit von der Statt Northeimb / an dem Vor-Hartz / gegen Morgen / vff einer Höhe gelegen / soll von Herrn Hertzog Bruno, zu Braunschweig vnd Lüneburg / erbawet / vnd nach Ihme genennet seyn / hat benebenst zimblichen Ackerbaw / vnd Viehezucht / schöne Fischerey / so wol an herrlichen Teichen / als dem gegen Mittag vff die Statt Northeim vorbey gehendem ForellenWasser / die Rühme genant.
Dieses ist eine fast grausame wunderseltzame Höle / dergleichen in keiner Historia verhanden / auch wol auff dem Erdboden solcher gestalt nicht zu finden; Es wird der Leser eine außführliche Beschreibung derselben / oben in der GeneralBeschreibung der Graffschafft Blanckenburg zu ersehen haben.
Ist ein Fürstliches Lüneburgisches Schloß / oder Ampthauß / vnd ein Stättlein dabey gelegen. Muß anfänglich zum Stifft Hildesheimb gehöret haben; Dann / wie Cranzius lib. 11. Saxon. cap. 9. vnd Bünting in seiner Chronike melden / als zwischen Hertzog Bernharden zu Braunschweig Lüneburg / vnd Bischoffen Johann zu Hildesheimb / ein schwerer Krieg entstanden / vnd Hertzog Bernharden Sohn / Hertzog Otto / Bellicosus, oder der grosse Otto von der Heyde genant / sampt seinem Vettern Hertzog Wilhelmen zu Braunschweig / in das Stifft Hildesheimb gefallen / vnd vnterschiedliche Oerter darin eingenommen / ist die Sache endlich / durch Vermittelung Ertzbischoff Dieterichs zu Cölln / dahin verglichen / daß die Hertzogen von Braunschweig das Schloß Borgtorff / welches sie bey wehrendem Kriege befestiget hatten / mit den dazu gehörigen Dörffern vnd Einkommen behalten. Darauff dann Hertzog Otto / wie sich davon Nachricht findet / im Jahr Christi 1433. das Schloß daselbst von newem auffbawen / vnd mit einem Walle vnd gedoppeltem Graben vmbziehen lassen. Damals hat Er auch das Stättlein / welches anfangs nur ein Dorff gewesen / vnd folgends ein kleiner offener Flecken worden / über die helffte erweitert / vnd mit einem Wall vnd Graben vmbgeben /
Matthäus Merian: Topographia Braunschweig Lüneburg. Frankfurter Kunstverein, Frankfurt am Mayn 1654/1658, Seite 63. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Braunschweig_L%C3%BCneburg_(Merian)_086.jpg&oldid=- (Version vom 31.7.2018)
_086.jpg&oldid=-){kind=link}
_086.jpg&oldid=3223370){kind=link}