Ren ram rehte rate enrůche nach meisterlicher orden

Ren ram rehte rate enrůche nach meisterlicher orden·
wie mag dc wunderliche wunder sin genennet·
es wc ein kint vnd wart ein man· vnd ist ein kint geworden·
dc wunder ist vúr wunder wunderlich erkennet·
es ist ein ren der wildekeit· ein ram der vmbehende·
zúht ein rint
vor alter get es hinder sich· sin lob hat wider wende·
dc wunder kint
treit gra gevar· gestopfil har vf kindes kinne·
es ist genant nv rate wirs dv des namen inne·

Dv́ swalwe vehet die mvcken· vúr den valken dc sie baget
den ertflůg vnd des wippers sweif kan si bas vͤben
ir armen qwittel schúrphen snar ǒch sange laget·
si wil mit listen aller vogel doͤne pruͤben·
dú lerhe vnd ǒch dú nahtegal· mv̊zen von der swalwen
verdulten spot·
dc ist mir leit ich klage es mere· denne ober die lǒber valwen·
ach herre got
wie sol ein tore werden wise der sich vergisset·
vnd zirket froͤmde kv́nste er die sinen núzet·

Der kúnig Nabuchodonosor· sach in eime trǒmen
ein bilde von erden an den himel reichen·
dem wc dc hǒbet gvldin wunderlich des nam gǒm·
brvst vnd arme silberin· dem selben zeichen·
der buch erin geschaffen was· dú diech von hertem stahel
isenin dú bein·
die fuͤsse erdin· ... dc brach zemale
ein grôsser stein
der kam vs einem berge an ellú werk· alleine·
der stein zereip das bilde vnd zebrach es kleine·

Das hǒbt gvldin ist dú kristenheit· vnd alle kristen·
swenne so der mensche in sime tǒfe wirt gereinet·
so ist er luter als ein golt· wil got sin leben vristen·
so nidert in dú sv́de sam dc silber meinet·
ist er danne sv́nden vol in sinem mitten iare·
eirin var·
ob er sih selben lútert niht· er wil verharten zware
in sv́nden gar·
so kumt sin alter vf dú bein múrbrvchig isen·
so brechent im die fuͤze erdin dc er mv̊z risen·

Se erzúrnet sich der stein· der vs dem berge kvmt gelǒfen·
er lǒfet vf den sv́nder dc er gar zerbrichet·
welhes ist der stein· dc ist der got der sich lies iesus tǒfen·
der berg ist maria von der man wunder sprichet·
got wc âne aller sv́nden meil· in ir von ir zekinde
wart er geborn·
er ist der stein si ist der berg· sin lǒf wirt vil swinde
swer ist verlorn
gar eweklich vnd also lange in sv́nden belibet·
dc in der stein alsam dc bilde gar zeribet·

Der lieben svͤzen milten herren angesiht mih froͤwet·
dc ich von herzelicher liebe mv̊s erschriken·
min herze hupfet mangen sprvng· mir ist vil vngedrewet·
swenne ich sihe getrúwer herren ǒgenbliken
dvnket mich dc firmamente^{[WS 1]} planeten vnd sterne·
mir nahen sin·
dc ich getrúwer herren ǒgeblike sihe· so gerne·
der svnnen schin·
mich froͤwet niht· so wol in svmelicher stvnde·
als ein grv̊s von eines svͤzen herren mvnde·

Anmerkungen (Wikisource)

1. Vorlage: fimam̄te.