Owe mins hertzen wunden

Owe mins hertzen wunden·
enbunden sich hant·
Die mir wan verheilet·
sust veilet· min lib in ir band·
dem tod in iamers rúwe·
min trúwe vergicht·
der vil seltenberen·
beweren· das mir we geschicht·
von senelichen sorgen·
kein borgen· ich han·
min truren ist gemant·
sust gepfant· ist min wân·
den ich hette ze vroͤden·
min goͤden ist gar hin getan·

Ach wie sol mir gelingen·
ir twingen mich tůt·
in senden sorgen alten·
verhalten· hat si mir hohen můt·
ich leb in iamers quale·
ze male nach ir
dú min nicht gedenket·
das krenket hertz vnd sinne mir·
ir zarten ǒgen blikke·
vil^{[WS 1]} dikke mich hant·
an senliches sorgen·
verborgen· gemant·
sust hat dú vil gůte
an můte· mich senden gepfant·

Ich was in liebem wane·
dar ane· mich hat gtan seldenbere·
dú swere· mir niemer zergat·
ich wand ich solte neigen·
súr eigen mich ir·
dar vmb ich sender warb·
das verdarb sunder wan· mir wol zwir
da von min vroͤde sinket·
vnd hinket· min můt·
sid si mir vroͤden stúre·
so túre nu tůt·
wie ich in iamer brin
vnd entzinn·
nach ir minn· als ein glut·

Anmerkungen (Wikisource)

1. Vorlage: vīl.