Owe dc nach liebe ergat (Mit originalen Lettern)
[412v]
Owe dc nach liebe ergat·
ein leit als mā eſ tribet·
dc wil mīne vn̄ iſt rat·
dc mā da vō ſcribet·
ſi ſpꝛach ſelbe wid̾ mich·
ſchꝛib dis leid voꝛ allē leide·
[413r] ſwa ſich lieb vō libe ſcheide·
trurig vn̄ vnendelich·
MJner frowē vn̄ mir·
wil ich die leit ſchꝛibē·
ſi lebet mir ſo leb ich ir·
vn̄ kvnnen v̾triben·
ǒch mit iamer vnſer klage·
mīne wil vn̄ kan gebietē·
dc wir vns dvr ſi genietē·
kvrzer froͤidē vn̄ langer tage·
Do mīne mir ſtúre enbot·
vn̄ weren[WS 1] wir da beide·
enſamēt ī dē froͤidē tot·
e dc wir ſvs mit leide·
ǒch des todes mvͤſtē weſen·
ſchone mīne frowe ſchone·
tobe niht ſo mit dime lone·
toͤte mich la ſi geneſen·
Toͤte mich vn̄ la ſi lebē·
nein ich enwil ſpꝛach mīne·
ich wil minē ſchiltgeu̾ten gebē·
v̾luſt vn̄ ǒch gewīne·
alſo ſtet an dē bꝛieve min·
dc ich mīne niht enhieịſſe·
ob ich vnv̾ſeret lieſſe·
zwei dú lieb eī ander ſin·
Mir were eī iar alſam ein tag·
ſo wir enſamēt werē·
miner ſoꝛgē wurde ein ſlag·
mit ſchimpflichē m̾en·
beide ſtille vn̄ offenbar·
des mv̊s ich vil dike truren·
bi froͤlichē nah geburen·
des iſt mir ein tag ein iar·
Anmerkungen (Wikisource)
- ↑ Vorlage: wer.