Owe dc nach liebe ergat (Mit aufgelösten Abbreviaturen)

Owe dc nach liebe ergat·
ein leit als man es tribet·
dc wil minne vnd ist rat·
dc man da von scribet·
si sprach selbe wider mich·
schrib dis leid vor allem leide·
swa sich lieb von libe scheide·
trurig vnd vnendelich·

MIner frowen vnd mir·
wil ich die leit schriben·
si lebet mir so leb ich ir·
vnd kvnnen vertriben·
ǒch mit iamer vnser klage·
minne wil vnd kan gebieten·
dc wir vns dvr si genieten·
kvrzer froͤiden vnd langer tage·

Do minne mir stúre enbot·
vnd weren^{[WS 1]} wir da beide·
ensament in den froͤiden tot·
e dc wir svs mit leide·
ǒch des todes mvͤsten wesen·
schone minne frowe schone·
tobe niht so mit dime lone·
toͤte mich la si genesen·

Toͤte mich vnd la si leben·
nein ich enwil sprach minne·
ich wil minen schiltgeuerten geben·
verlust vnd ǒch gewinne·
also stet an dem brieve min·
dc ich minne niht enhieịsse·
ob ich vnverseret liesse·
zwei dú lieb ein ander sin·

Mir were ein iar alsam ein tag·
so wir ensament weren·
miner sorgen wurde ein slag·
mit schimpflichen meren·
beide stille vnd offenbar·
des mv̊s ich vil dike truren·
bi froͤlichen nah geburen·
des ist mir ein tag ein iar·

Anmerkungen (Wikisource)

1. Vorlage: wer.