Ob al der w̾lte gar gewaltig w̾e ein man
[418v]
Ob al der w̾lte gar gewaltig w̾e ein man·
vn̄ ob ſin ſin dvrh ſinde dc nie ſin dvr ſan·
vn̄ ob er wūder w̾e vber ellú wūder
ob in gelúke truͤge vnz an d̾ himel ſteln·
vn̄ ob er kvnde bꝛuͤuen wiſſen vn̄ zeln·
des mers gries die ſt̾nen gar beſvnder·
ob ſin kraft eine tvſent riſen·
mālih moͤhte ervellē vn̄ twinge·
ob hohe b̾ge vn̄ velſe riſen·
dvr ſin gebot vn̄ ob er moͤhte bꝛingē
ſwc waſſer luft vúr erde birt
ſwc wont vō grvnde vnz an dē thꝛon der ſvnnē·
ob im zerehter ê gegebē
nach wūſche w̾e ein wib in erē wunnē·
kv́ſche vn̄ reine wol gezogen d̾ ſchoͤ̂n ein vb̾gulde·
vn̄ ob er mit ir ſolte lebē gar
tvſent iar·
was w̾e es dāne vn̄ ob er niht erwurbe gottes hulde·
Dv hohgelopter ivngeling vol komēd̾ man·
froͤi dich d̾ hohē hilfe dú dir fuͤgen kan·
w̾ltlich̾ froͤiden hoꝛt in w̾ender wūne·
dur lutert gar ir liehte bꝛehend̾ lieht̾ ſchin·
dvr froͤmdet vn̄ virrēt ſchamelichē pin·
vn̄ vuͤret dich alſam dē tag dú ſvnne·
wc w̾e dī lib din w̾des lebē·
din hoh̾ mv̊t din vnv̾ſch̾tes ellen·
wer koͤnde vꝛoͤide dir gegebē·
wē woldeſt lieblichē dich geſellē·
wc w̾e richeit hohgewalt
froͤideb̾ndú kraſt mālich̾ mv̊t mit ſīnē·
rv̊m ere ſelde manigvalt
rilicher pꝛis dis reinē h̾zen mīnen·
wie koͤnde ivgent ī tvgendē ſchone vn̄ alter w̾dē griſe·
vn̄ were wib·
d̾ reiner lib·
dir iſt gegebē· zehilfe gar dar vmbe ir lob ir lebin ir eren pꝛiſe·
Dú milte mit vil tugēdē treit deſ hoͤhſtē pꝛis·
dú milte hoͤhet blvͤnde ivgēt vn̄ alter gris·
dú milte vs h̾zen valſche wirde billet·
dú milte zieret megde namē vn̄ reines wib·
dú milte túret hohes w̾deſ mānes lib·
dú milte vs erē runſe manigē gewillet·
dú milte balſemt edelē man·
dú milte ī eren ganzē wirde rútet·
dú milte zieret vf dē ban·
da reines h̾ze lieblich wirt getrútet·
dú milte wirdet mēſchen mv̊t·
dú milte gotes zúrnē ſtete ſlihtet·
dú milte lútert h̾zen flůt·
dú milte ſich zewarer mīne flihtet·
dú milte vs mānes h̾zen gegē den wibē ſv̊ze ſmieret·
dú milte iſt beide hie vn̄ doꝛt·
ein w̾der hoꝛt·
nv wiſſent dc dv́ milte himel vn̄ erde hat gezieret·
Dú kerge birt vn̄ iſt vn̄ pꝛuͤuet māige vntvgent·
dú kerge nid̾t alt̾ vn̄ vnwirdet ivgent·
dú kerge ſeltē hohen pꝛis erwirbet·
dú kerge iſt gegē den tvgēdē gar ein h̾ter vlins·
dú kerge ſelten bꝛennet richer erē zins·
dur kerge māic rilich lob v̾dirbet·
dú kerge iſt gegē den tvgēden las·
dú kerge manigē laſt̾ mal bewiſet·
dú kerge treit d̾ milte has·
dú kerge ſchande zwilhet vn̄ dꝛilhet·
dú kerge laſſet an d̾ ſchꝛift·
dú kerge an w̾dekeit iſt gar v̾ſtūmet·
dú kerge haſſet eren trift·
dú kerge laſt̾ denpfet vn̄ ſv̄met·
dv́ kerge niem̾ ſtvnde keiner arger vůre entwenket·
dú kerge ein rǒb̾in iſt hoher erē tat·
dú kerge hat·
vil māgē doꝛt in w̾de ſache v̾ſenket·
IN Galathit ī dem lande eī vogel ſus·
genēnet vn̄ erkēnet iſt Galadꝛius·
ſne wis ſī lib vn̄ al ſin gevid̾e·
deſ vogels ſehē vn̄ ſin art hat ſolhe maht·
ſwc ſiechē er an ſiht es ſi tag oder naht
d̾ iſt geneſē· er ſi hoh od̾ nid̾e·
ſwē ab̾ er die geſiht entſeit
d̾ mag geneſē niht· daſt eī wunder·
ī ſinē rehtē beine er treit
d̾ iſt dē ǒgē gv̊t beſvnd̾·
des wúnſche ich h̾ren ſvnd̾ has·
dc iegelich̾ hete ir einē da mit ſi ſtreichtē·
ir ǒgē dc ſi deſte bc·
geſehē moͤhtē wē ſi ir gabe ſleichtē·
ſo wolt ich habē div ǒgen ſin· dur dc ich moͤhte m̾en·
d̾ richē argē kargē tot·
in w̾nde not·
vn̄ wolte die geſihte mī ze den vil miltē kerē·
IN ýdúmea wont ein tier taphart genāt·
dc iſt vō wūderlichē ſachē zwein erkāt·
voꝛ allē vꝛechē tierē vſ geſvnd̾t·
dc ſelbe tier voꝛ mittē tage d̾ kv́nheite pfliget·
dc aller tiere kv̊nheit klein der gegē wiget·
vn̄ deſ loͤwē ſwie d̾ ſtete wūdert·
ſwēne es kvmt vb̾ dē mittē tag
ſo iſt ſin vꝛechú kv̊nheit alſo kleine·
dc es ſich niht [419r] er ettē mag
voꝛ zageheit· ſwc lebt in der gemeine·
ſich ivnger man dc tútet dich
dc m̾ke· vn̄ nims in dineſ h̾zen kloſen·
dise rede wūderlich
die enhabe niht v̾ſmehe· not v̾ſoſen·
es hat mit dir vn̄ dv mit ime ſo gv̊ter maze pfliht·
nv ſchaffe alſo in diner ivgent·
ſo dc din mvgent·
din vꝛecher lib wirt in dem alt̾ gar als dc tier zenihte·
Pardꝰ ein tier genēnet iſt kvͤne vn̄ balt·
ī rehter foꝛme gros vn̄ da bi wol geſtalt·
dē ſin nature froͤmde mīne bꝛinget·
das ſelbe tier wont ſtete d̾ loͤwīne bi·
ſwie doh des loͤwē kraft vn̄ mīne beſſer ſi
vn̄ wie ſin zagelſwarte ī zoꝛne ſwinget·
klein im dc alleſ gegē ir frumt·
ſin habe doh zů im dc tier vil zarte·
vō diſen ſachē ſo kūt
ſnel vetche ī valw̾ varwe d̾ lehparte·
der ſnelheit niht niht entrinnē kan·
ī ſpꝛúngē dꝛin ſwc lǒfenſ pfligt vf erdē·
dē geliche ich einē boͤſen zagē·
d̾ lebt ī hobet ſchā in vil w̾de·
d̾ iſt noh ſneller dāne dc tier vō dē erē hin zer ſchande·
dē wúnſch ich dc er w̾e ſam·
vetch dvr die ſcham·
das in bi dē lútē vúr ein kebs kint erkāde·
Rât an wc dc ſi wol gelerter wiſer mā·
hab iem̾ groſſē dank d̾ es geratē kā·
es iſt geboꝛn nah rehtes mēſchē bilde·
es iſt mager vn̄ lang gar bꝛeit iſt ſin gewalt·
eſt an dē mv̊te ivng vn̄ an dē iarē alt·
im iſt dú barmh̾zekeit vil wilde·
es núzet ellú tútſchú lant·
vn̄ lat doh wenig iemā mit im niezen·
es es hat gerǒbet vn̄ gebꝛant·
es kvnde ǒch hoher erē nie verdꝛieſſen·
ſwa es ſich dike nid̾ lat·
da wuͤſtet g̾ne dc wil ich v̾wettē·
wā mir des manig̾ bi geſtat·
vn̄ zúge es an die burger in den ſtettē·
es zúrnet hie vn̄ ſuͤnet doꝛt ſin lachen iſt gehúre·
... es reiſſet den·
es weis wol wē·
ich wēne dc es zeratē ſi dē toꝛē allē túre·
Swel hohe fúrſte nv hat hohes kv́niges namē·
lib vn̄ mv̊t ere vn̄ wirde vn̄ werdē gamen·
ſwie hoh ſi ſin gewalt vn̄ witē mere·
er ſi ein rom̾ vng̾ beheī ein franzoýs·
ein ſchotte ein ſpangol ob ein engelſch kurtoýſ·
ein krieche eī rúſſe ein w̾der kipperer·
ein thene eī ſwede ein bulger od̾ ein ſoldan·
ein tateler vō Thvnſchrich ein heidē·
vō marrach granath vō maivrge doꝛes ſalnegge·
vō matſchǒwe vō arragvn vō poꝛtigal·
vō hammametha·
vō niuerne kýmelle vō littǒwe·
der moͤhte ſich deſ geſtē wol mit erē vn̄ mit ſchalle·
het er ſo ſtolze helde gv̊t·
vf erē mv̊t·
vn̄ alſo balt vf vꝛeche tat ſam ſint die ſtoͤꝛrē alle·
Des hohen ſtarken groſſen wūdereſ kraft
d̾ da vō nihte gar geſchůf[WS 1] alſe die geſchaft·
vn̄ an ſich nam w̾des menſchē bilde·
geburt beſnidvnge[WS 2] vn̄ den iemer wernden tǒf·
vn̄ der ſich lie v̾kǒfen ſines tǒfes kǒf·
des wūder werk ſint manigú wūder wilde·
d̾ ſinē vatt̾ vatter iſt hêr vn̄ eben
vn̄ an dc vꝛone krúze wart gezwiket·
des gotheit iſt in ein geweben·
vn̄ doh in dꝛilich geflohten vn̄ geſtriket·
deſ ſeſſel iſt d̾ himel doꝛt·
vn̄ hie dú erde ſiner fuͤze ſchamel·
des kūſt ī zoꝛne wirt gehoꝛt·
vn̄ in dem mūde ſin eī fúrig lamel·
der ſich in ein̾ reiner megde wammē konde windē·
d̾ ſelbe laze ſich ǒch gar·
d̾ engel ſchar
mit ſteter hv̊te bi vnſ hie vn̄ doꝛt an ende vindē·
Ob al den wūd̾n m̾kent wel ein wūder gros·
dc iſt geſelle deſ ſchepfers erde glos·
vn̄ ǒch zerehter ſippeſchaft gebvndē·
dis wūdert vns in iem̾ w̾nde froͤide ſchilte·
vn̄ wie er ſich in einer megde wambe[WS 3] vilte·
vn̄ bi d̾ wart got vn̄ mēſche fvndē·
wie ſin enpfieng vn̄ ſin genas·
rein vngemeilet dc tot vō tode vns lôſte
vn̄ er an ſich nam dc er niht wc·
vn̄ beleib dc er wc ê vil manigē zetroſte
an im wart d̾ nature kraft
ī w̾nd̾n wirde erhoͤhet vn̄ ernv́wet[WS 4]·
geſelle vn̄ geſippeſchaft
deſ tǒfes ê v̾ſigelt vn̄ v̾trúwet·
vn̄ wie er vſ dem hohſtē trone kam in diſ ellende·
vnde wie er ſich liphafrig birget ī ein bꝛot
dvr vnzer not·
vf dē alter in eineſ pꝛieſt̾s hēde·
Dv w̾der mēſche deſ m̾ke vn̄ ere pꝛieſt̾ſ lebē·
ſit im ob aller meſchē lebē iſt hie gegeben·
vn̄ d̾ engel kraft doꝛt ho gewūdert·
ſin hohú wirde me twīget vn̄ ſin [419v] hoh gewalt·
dir fuͤget hoher ſeldē heil vil manigvalt
wirt ere froide doꝛt vn̄ hie beſvnd̾t·
vō im geſegent wirt d̾ tǒf·
dar ine dv noh kriſten wirdeſt kriſtē·
ſin ſegē dir froͤmdet ſv́nden kǒf·
ſin lere dich mit liſten· hie kan vꝛiſtē·
kúſcheheit d̾ ê· wc ritterſchaft
enbindē vn̄ bindē· mit in v̾ſidelt
kv́nig vn̄ hohe keiſerſchaft
ſin hoher gewalt v̾rigelt vn̄ v̾ſigelt·
ſi lebendē nēment in gebent ich mag dich wol wiſen vō w̾ndem roſt·
in ſinē handē wandelt[WS 5] ſich goteſ wūd̾s bꝛot[WS 6]·
almehtic got·
vleiſch vn̄ blv̊t· beide im vn̄ dir zet̊ſtê·
Des m̾ke vn̄ froͤwe dich hoher w̾der wiſer mēſche·
dú ſiſt tútſch welſch wīdeſch vngerſch oder theneſche·
vō ſwelh̾ hande ſpꝛache dv ſiiſt kriſtē·
d̾ wirde der dir got beſvnd̾t hat gegebē
nach tode doꝛt ein iem̾ w̾ndes ewig lebē·
vn̄ hie dc din ſin wund̾ kan v̾liſtē·
dir dienet gar d̾ w̾lte maht·
deſ hohſtē kraft vn̄ al die himel wūne·
wc bꝛingē mag tag vn̄ naht·
die mane ſt̾nē zirggel bꝛehede ſv̄ne·
vúr waſſer luft d̾ erden rugge·
ſwc flúget flúzet wehſet od̾ ſwīmet·
d̾ wīde ſvs d̾ wolken vluͤge·
bliczen donrē ſwc ſtat od̾ klīmet
dc dient dir alleſ vō im dar· dar vmbe ī ſtete ṕſe·
ǒch wād er dir ſich ſelbē git
gar ane ſt́t·
vúr arger gelſter kúndekeit ſo hohe zeiner ſpiſe·
Ob allē frowē frowe reine gebende nar·
dú kroͤnt mit hoh̾ wirde ob al der engel ſchar·
dv́ w̾de gotes tohter vn̄ kriſtes amme·
din lib mit manigē richē tvgedē iſt geb̾let·
dv Yb̾ſchoͤneſt doꝛt die himel gar· vn̄ hie die w̾lt
din h̾ze enzv́ndet hat· deſ hohſtē flāme·
dv wiſe ſalomones thꝛone·
vn̄ ǒch vúr war ezechieles pfoꝛte·
dv reines vel Gedeon·
mit kúſche hielt ein warú tǒfes poꝛte·
dv tēpel der dꝛivaltekeit·
dv goteſ ſeſſel vn̄ gotteſ kindeſ kloſen·
din lib trůg dē der nv da treit
den himel erde ǒch ſagēt vnſ die gloſen·
dē alle himel niht bevahē kvndē māigvaltig
dē vieng din ſchos dvr vnſer heil·
frowe ane meil·
nv bit vúr vnſ dē ſelbē got ſit dv biſt ſin gewaltig·
Sich ritt̾ w̾t an dine hohe w̾dekeit·
kleide dinen werden lib mit w̾dēkeit·
ſit dc dir iſt ere vn̄ pꝛis gewidemt·
pflig ſchiltes ampt ſchone vn̄ ere ſw̾tes ſegen·
bis vꝛidebere ī velden welde· vn̄ vf wegē·
wirb ſo dc vnreht ſtruchē voꝛ ir bideme
trúwe vn̄ warheit ſi dī hoꝛt·
bút helfe g̾ne witwē vn̄ weiſen·
wirb nah ṕſe hie vn̄ ſchatze doꝛt·
vn̄ la dich niht an erē vindē heiſen·
dú tvgende dih ī alle wiſ
la dich in w̾der wibe dienſte ſchowen·
halt hohgeloptē ritt̾spꝛis·
ſo das dich ṕſen hohgeboꝛne vꝛowē·
milte kúſche trúwe vn̄ ſchame mit erē ime heilſet·
tůſt dv dc w̾der ritt̾ wis·
ſo wirt din pꝛis·
din pꝛis din rilich lob din w̾der name in erē wis gevelſet·
Gros ein gebirge capitania hat das lant·
mvͤzig vn̄ mezig loſacania genant·
dar vs ein walt gewahſen vollen doꝛnig·
dar īne wont ein wurn vō wūderlicher ahte·
ſwāne d̾ erzúrnet wirt ī ſiner ahte mahte·
er ſchvͤfe wol es wurde eī riſe zoꝛnig
ſin mvnt hat gran vn̄ niend̾ zene·
ſin hals iſt kurz oꝛn vn̄ ǒgē kleine·
ſich mēſche dar nah dich niht ſene·
vnfůrig lib vn̄ iſt gar an gebeine·
zwei hoꝛn ſtant an der ſtirne ſin·
da mit er manigē vꝛechē hat betwūgē·
kuͤn alſam ein eb̾ſwin·
ern hat h̾ze leb̾ noh die lvngen·
ſechs ane fuͤze bein er hat· kauwē ſcharf gemezē ſvnd̾ elne·
ſin zagel iſt ſpitzig vn̄ niht lang·
trag iſt ſin gang·
ſittē ſmal ſin ruch rugge dc rate ſwer es welle·
Barmvnge daſt eī tvgent dú dir wol mēſche zimt·
barmvnge túret dir dinē lib dich vn̄ nimt·
dir iem̾ w̾nde ſache vn̄ arke tregede·
barmv̄ge birt dir ſteter hoher eren ſedel·
barmvnge froͤmdet dir gar aller ſchandē wedel·
barmv̄ge verret dir helſches gegegede·
barmv̄ge dich hohe hat getúret·
wā ſi hat [420r] rilich dich erkempfet·
barmvnge iſt alſo gehúret·
dc ſi dir got hat ze ingeſigel geſtempfet·
barmv̄ge dú iſt ſo rich ein tvgēt
dc ſi ſich hie vn̄ doꝛt ze gotte ſmvket·
barmvnge ſchv̊f dc mit ir mvgent·
dc got dih vs d̾ hellen poꝛtē zuhte·
barmv̄ge ſchv̊f ǒch dc got hie kripte vn̄ barnde·
dar an gedenke ein menſche wis·
dvr dinē pꝛiſ·
vn̄ mīne erbarmede· durh dc dich got ſo túre da mit erarnde·
Het ich des kúniges ſalomoneſ wiſheit ganz·
vn̄ abſolones ſchoͤne da bi ſvnd̾ ſchꝛanz·
vn̄ gewalt des richē kúniges dauideſ·
w̾e ich da bi noh ſterker dāne ſih wc ſamſon·
koͤnde fúr bꝛingē als hoꝛāt ſvͤzen don·
vn̄ w̾e gewaltig alles golt geſmideſ·
w̾e ich als ariſtotileſ
vn̄ koͤnde kvnſt als virgiliꝰ· zǒberie
vil wol moͤht ich mich troͤſten des·
w̾e ich d̾ beſte ī artvs maſſenie·
w̾e ich als adam edel gar
vn̄ gvras wc trut dē vꝛowē allē·
vꝛo ioh grīme vn̄ zivhte bar·
vn̄ Gawin wē moͤhte dc miſſevallen·
het ich tvgent als ſeneca dc ze d̾ w̾lte ein wūne·
vn̄ dc ich w̾e zen fuͤzē ſnel·
als azachel·
hie vúr neme ich dc ſich mī lieb gegē mir lieblich verſvnne·
Zahý wc hoh̾ tvgēde hat
got dē kv́nic gegebē·
vō rome der dvrh niemā lât·
er mīne got vn̄ rehteſ lebē·
vꝛowē vn̄ wibes tvgent zuht ſtetē mv̊t beſcheidēheit·
ſine fv̊ꝛe vn̄ ſinē rat·
geliche ich ſchone vn̄ eben
kv́nig karlen ſvnder miſſetat·
dar nah dē rehtē kvnde ſtrebē·
got lieb als dauid vn̄ ioſias den ſchande meit
frō als ivdas machabeus· kv̊n als ionathaſ
kv́ſche als ſamuel der gotes ꝓphete wc
gedultig als Job·
diemvͤtig als moýſes
milt vn̄ gůt als wc iacob
gereht gegē got als ſýmeon·
ſtritber als iˢoboam· ſtark als ſamſon·
wiſe als ſalomō·
ein helt alſ Joſue·
dē got dē ſvnnē hies ſten vn̄ dē tron·
diſe tvgent alle got hat an dē kúnig karlen geleit·
Der kv́nige bv̊ch vns kv́ndet in d̾ altē ê·
dc ein vn̄ driſſeg kúnige ſlůg· d̾ helt Joſue·
vn̄ hiengeſ ǒch an vrteil· ahtowe beſvnd̾
dur dc ſi dē rehtē warē wid̾ do·
vō irl̓m ieremút vn̄ iericho
tabir agil latis vn̄ volkes wūdert·
maiaton iaggenen ebꝛī
cedeſ terag affer affeg vn̄ h̾mo
odullum ſvmvlon eglon
thoꝛ vn̄ toꝛt· azoꝛ vn̄ lemna
Madan agſaf betel
erec cader gazer· carmeli Jebvzen
Maceda tagviga galgal
ethihen vn̄ terſvm· kananē·
v̾nſemn emmvrrem d̾ tag wag ... gelich
deſ hueten ſich die fúrſtē die dē rehtē
wid̾ ſin
dc úch niht ſam geſchehe vō dē kúnige vn̄ vō dē riche·
Swas hoher fúrſtē h̾re hat des rineſ flus·
vō tiſētis hin abe bis in den ſwachē dus·
d̾ aller helfe iſt da niht ſelderichē·
ſwas ir hat hollant bꝛabant vlandern vn̄ kreien·
wettelant weſt̾rich· vn̄ Loꝛreý d̾ karſte·
v́rol ſtire kernd vn̄ oͤſt̾rich·
ſwc ir ī vꝛanken iſt erkant·
die vꝛoͤwēt mich ſeltē mit ir gabē·
ſam tv̊nt die helde ī peierlant·
die bi der etſche vn̄ ǒch die ſtolzen ſwabē·
dúringē ſachſen miſſenere·
d̾ wettrobe heſſe vn̄ ǒch der weſteval·
d̾ behein vn̄ d̾ polan· d̾
wintſchē· h̾rē gabe ich ſeltē male·
ſvs bin ich vō ir aller helfe leid̾ gar v̾dꝛvngē·
dc klage ich dē hoh geloptē fúrſtē w̾t·
der ere gert·
vō badē vn̄ ǒch von b̾ne dē altē vn̄ dē ivngē·