Nv wúnschent alle der svͤssen

Nv wúnschent alle der svͤssen·
das si mich noch meine·
in der liebe als ich sii·
vnd das ir loslichs gruͤssen·
mich doch twinge alleine·
des wúnschent ǒch mii·
swenne ich ir wangen·
bedenke vnd ir munt·
so hat mich gar zit geuangen·
dv́ vil zarte reine·
mir wart froͤide enzunt

Ich sach ir munt sam ein rose·
swer des kvnde warten·
an ir wengelin·
da brach dur wis rot so lose·
das ich tet vnrecht hopphe garten·
nant ich gruͤbelin·
vor sendem smerzen·
wart min froͤide gantz·
si hies ie trut in dem herzen·
die wile das wir sparten
der schoͤne glantz·

Secht^{[WS 1]} an ir munt in ir ǒgen·
bruͤfent ir kinne·
vnd merkent ir kel·
der ich můs iemer vil tǒgen^{[WS 2]}
lip vnd sinne
an ir gnade bevel·
dv́ ist an ênde·
gewaltig nu min·
ich valde ir hertze vnd hende·
genade keiserinne·
ich můs din eigen sin·

Anmerkungen (Wikisource)

1. Vorlage: Recht.
2. Vorlage: tǒgem.