Nv sint die liehten lange sumertage

Nv sint die liehten lange sumertage·
mir aber ane froͤide hin gescheiden·
was hilfet das ich senden kumber clage·
der lieben dú mich lat in senden leiden·
doch mv̊s ir minneklicher schin·
vor allen wiben·
in minem herzen húte vnd iemer sin·
o we sol ich niht fro bi ir beliben·

Wil dú vil here dc ich vro beste·
so sol ir roter munt mir guͤtlich lachen·
dc von getrúwes herzen grunde vf ge·
so wirt erlost min herze vs senden sachen·
beschiht^{[WS 1]} des niht owe der not·
so mv̊s verswinden·
min hoher mv̊t ist vnd froͤide tot·
dc niht erget sol ich genade vinden·

Do ich die minneklichen erst an sach·
do bran ir munt dc sich min herze enzunde·
da von so lide ich sendes vngemach·
dc hat gewert da her vil lange stunde·
vnd wirde ǒch niemer me gesvnt
von minne wunden·
mich heile danne ir rose roter mvnt·
des kus hilft mir vnd anders niht gesunden·

Anmerkungen (Wikisource)

1. Vorlage: bescht.