Nv siht man die grvͤnen heide

Nv siht man die grvͤnen heide·
wol bekleidet wol geschoͤnet
schǒwent an den grvͤnen walt·
nv hoͤret man die vogelin singen·
in den wnneklichen ǒwen·
die der kalte winter twang·
die siht man in wnnen beide^{[WS 1]}·
vogel sanc mit froͤiden doͤnet·
wan ir stimme ist manigvalt·
nv siht man die blv̊men springen·
der mag man ein wnder schǒwen·
sit der liebe svmer ist hie·

Manger froͤit sich gegen der wnne·
so leb ich in sender swere·
nach der lieben frǒwen min·
dv́ da kan so svͤsse lachen·
swenne ir roter mvnt erlachet·
vnd er liebe lachen sol·
bas danne ich erdenken kvnne·
kan si wol dv́ seldenbere·
kv́sche vnd da bi wiplich sin·
si kan mir die froͤide machen·
dc min herze an froͤiden kranket·
frǒwe minne dar zv̊ sprich·

Minne hilf dc mir dv́ here·
dú mir in min herze tǒgen·
mit ir liehten ǒgen brach·
mine sende swere bvͤsse·
die ich von der schonen dvlde·
doch froͤit mich ein lieber wan·
das si mir min leit verkere·
wan ich han dast âne lǒgen·
von ir sendes vngemach·
minne sprich dc si mich gruͤsse·
minne wirb mir vmb ir hvlde·
sost mir senden siechen bas·

Anmerkungen (Wikisource)

1. Vorlage: beiden.