Nv hilf wibes gvͤte (Mit originalen Lettern)
[245r]
Nv hilf wibes gvͤte·
mir iſt not der helfe din·
mir wil hohgemvͤte·
ſterben in dem h̾zen min·
wibes gvͤte dv biſt gůt·
hilt dc iht v̾derbe
ſo iemerlich min hoh̾ mv̊t·
Swa man ſaget dc mere·
das min lip gevangē lit·
dc iſt den frowē ſwere·
wan dien diene ich mine[WS 1] zit·
ſwelhú wiblich gvͤte hat·
ich weis wol min kvmb̾
ir ze herzen nahe gat·
Von ſwem mich v̾lieſent·
guͤtú wib der habe fúr war·
die ſchulde ſi verkieſent
niemer innekliche gar·
dc iſt reht· es iſt alſo·
ſit ich bin ir leides
trurig vn̄ ir eren fro·
Miner frowē guͤte·
vn̄ ir lieplich ſchoner lip·
nert mir hohgemvͤte·
durh ſi ere ich ellú wip·
dc hat ſi v̾ſchuldet· wol
dc ich dur ir ere
allē frowē diene ſol·
Dem vil w̾den wibe·
mv̊s man hoher tvgēde iehen·
an ir ſvͤſſen libe
wart vnwibheit nie geſehen·
ſi iſt ſchoͤne ſi iſt gv̊t·
kúnne blide ſtete
zůhterich wiblich gemv̊t·
Roter[WS 2] danne ein roſe
iſt ir mvnt· ſvͤſſe vn̄ heis·
ſi iſt mit zúhtē lôſe·
ſchoner wib ich niender weis·
bꝛv̄ ir bꝛa wie ir lip·
vō geburte ein frowe·
iſt ſi vn̄ vō tvgendē wip·
Kúſchlich ſmieren lachē·
kan ir vel roter munt·
ſi kan ſuͤſſe machē·
ir geberde zallet ſtvnt·
ir mvnt vn̄ ir ǒgen liht·
ſo mich dv́ an ſehent
hohes mv̊teſ mā mich ſiht·