Nv helfent mir klagen· dc der vogellin schallen

Nv helfent mir klagen· dc der vogellin schallen·
der winter hat gesweiget·
des mvͤsse er sin geveiget·
mit sinem sne·
tůt er vil manigem dinge we·
das mv̊s mir vnd manigem harte missevallen·
ich klage ǒch heide vnd anger·
die húre wurdent swanger·
vil blůmen glanz·
da wart gebrochen manig kranz·
seht wie der winter die werlt gekleidet hat·
vns git mit grimme sin kunft blanke wat·
des mvͤsse er sin uerwassen·
dc er sus kan vnmâssen·
mit siner kraft·
tůt er dú herzen schadehaft·

Min trôst den ich sůche lit an einen wibe·
der schoͤne ist âne mâsse·
si kan die rehten strâsse·
gewisen wol·
die man ze froͤiden pfaden sol·
es lit hohú kvnst an ir vil reinem libe·
si kan wol sorge wenden·
vnd hohgemvͤte senden·
si kan noch me·
si kan uertriben sende we·
si kan ǒch heilen da minne hat verwunt·
si kan ǒch buͤssen dem iamer ist kvnt·
si kan ǒch wol entsliessen·
moͤhte ich des iht geniessen·
der herzen túr
si twinget sende not der vúr·

Ach got dc din kvnst mit flîsse hat gegossen·
nach wunsch ein schone bilde·
dest mir sorge wilde·
sin schoͤne tůt·
mih dike vnd ofte hohgemv̊t·
dc bilde ist vor allem wandel gar beslossen·
sin lib ist wol gestellet·
es ist zetrôste erwellet·
dem senden man·
des herze vf minne ie sere bran·
vragent mich der mere mirst vmbe dc bilde kvnt·
ist min frowe div́ mich hat verwunt·
der guͤte wendet mere·
div senden herzen sere·
dan wurzen kraft·
vnd aller steine meisterschaft·

Ich han mine stvnde her verzert mit leide·
selig wib dc wende·
trôst minem herzen sende·
trost lit an dir·
trôst troͤste min gemvͤte mir·
dv weist min nôt davon mich frowe scheide·
ih lîde an minem herzen·
gar vngefuͤgen smerzen·
min grôste leid·
ist dc mir tet din mvnt verseit·
sin lachen do ich dir klagete mine nôt·
din liehte varwe wart von schame rôt·
doch moht ich niht erwinden·
dv mvͤstest dc bevinden·
dc dir min lib
gedienet hat fúr ellú wib·

Swa lieb lit bi liebe lieblich sú sich siebent·
lieb kan sich lieber machen·
gegen lieb in lieben sachen·
dú liebe birt·
dc lieb mit liebe lieber wirt·
swer lieb tǒgen minnet hi wie da zerstiebent
die sorge von der liebe·
wan spúrt da minne diebe·
dc tǒgen lieb·
ist tǒgenlich ein minne dieb·
dú liebe ir herze ir liebe mit liebe git·
si hat ir liebes dur liebe alle zit·
wan sol nach liebe ersterben·
ald lieb mit liebe erwerben·
dú liebe ist gůt·
lieb liebet liebe lieben mv̊t·