Nv froͤit úch minnegernde man
[241v]
Nv froͤit úch minnegernde man·
wissent dc úch rehte froͤide machet wert·
vnd dc nieman werden kan·
eren rich wan der mir froͤiden eren gert·
mit zúhten fro dc ist ein leben·
dem got vil eren hat gegeben·
Swer werder wibe minne wil·
vnd ir grv̊s verdienen der si hohgemv̊t·
swie selten ich ir minne stil·
doch weis ich wol das gůten wiben sanfte tůt·
der durh siv zuht bi froͤiden hat·
des dienst in zeherzen gat·
Wie sol ein vngemv̊ter man·
erwerben hohgemv̊tes wibes habedanc·
wil er ir ertruren[WS 1] an·
dc si in minne so ist sin tvmber wan vil kranc·
ir hohgemv̊tes herzen rât·
sin truren hat vor missetat·
Mit sorgen nieman kan began·
werdes wibes minne vnd ǒch ir frúntes grůs·
truren mac wol missegan·
gv̊ten wiben wan da von wirt eren bůs·
ich rat iv mannen hohen mv̊t·
sit wiben froͤide sanfte tůt·
Ich wil hohes mv̊tes sin·
vnd wil dvrh gvͤtiv wib gegen ir min zúrnen lan·
di ich ê hiez die[WS 2] frǒwe min·
si weis[WS 3] wol selbe wie si hat an mir getan·
dc si verkorn dvr gvͤtiv wib·
den iemer dienen mv̊s min lip·
Swa ich mich versvmet han·
an rehten froͤiden dc sol man mir vergeben·
wan ich wil nv erst haben an·
mit hohem mv̊te vnd mit ritterlichem leben·
swer von mir hohes mv̊tes gert·
der wirt des volleklich gewert·