Mirst min altú klage húre nv́wer danne vert

Mirst min altú klage húre nv́wer danne vert·
dc die blv̊men maniger treit·
dest mir leit·
der niht lǒbes were wert·
alsus klage ich die blůmen vnd der kleinen vogelin sanc·
der ich beider niht engan
manigem man·
der des mv̊tes ist zekrank·

Sold ich wúnschen so wolt ich den vogelin wúnschen das·
dc si heten einen sin·
vnder in·
vnd die lúte schieden bas·
swer den lúten danne svnge als ir herze stat·
so erkand ein iegeslich·
selbe sich·
rehte wc er tvgende hat·

Swes dú nahtegal mit sange nême war·
der moͤht iemer wesen vro·
seht also·
wurde ein vingerzeigen dar·
swem der gvggǒch svnge·
vnd ǒch ein distelvinkelin^{[WS 1]}·
den bekanden man da bi·
tvgenden vri·
we wie vil der mvͤste sin·

Anmerkungen (Wikisource)

1. Vorlage: tiſtelvinkelin.