Mir tv̊t einer slahte wille

Mir tv̊t einer slahte wille·
sanfte vnd ist mir doch dar vnder we·
ich minne einen ritter stille·
dem mag ich nit versagen me·
des er mich gebetten hat·
tv̊n ihs nit mich dvnket das min niemer werde rât·

Dicke dvnke ich mich so stete·
mines willen so mir das geschiht·
swie vil er mich denne bete·
al die wile so enhvlfe es niht·
ieze han ich den gedank·
was hilfet das der mv̊t ist kvme eines tages lank·

Uil er mich vermiden mêre·
so versůchet er mich al zevil·
ǒwe des vorhte ich vil zesere·
das ich mv̊s volgen swes er wil·
gerne het ichs nv getan·
wan das ichs im mv̊s versagen vnd wibes ere sol began·

IN getar vor tvsent sorgen·
die mich twingent in dem herzen min·
den abent vnd den morgen·
mag ich leider^{[WS 1]} niht getv̊n des willen sin·
das ihs iemer einen tac·
sol gevristen das ist ein klage dv́ mir vil nahe bi dem herzen lac·

Sit das im die besten iahen·
das er also schone kvnne leben·
so han ich im vil nahen·
eine stat in mime herzen geben·
da noch nieman in getrat·
si hant das spil verlorn vnd er eine tv̊t in allen mat·

Anmerkungen (Wikisource)

1. Vorlage: leideider.