Mir sint die sinne wunt

Mir sint die sinne wunt·
vnd siech gewesen von vil banden·
dc ist in rehte kunt·
sit sie ein frowen erst bekanden·
der keiser ist in allen landen·
kuster si zeiner stunt·
an ir vil roten mvnt·
er hete sin iemer frome ze sinen handen·

Sit ich dc herze han·
verlassen an der besten eine·
des sol ich lon enpfan·
von der selben die ich da meine·
swie selten ichs ir bescheine·
so bin ich es doch der man·
der ir bas helles gan·
danne in der werlte lebe deheine·

Wer moͤhte mir den mv̊t·
getroͤsten ane ein schoͤne frowen·
dú minem herzen tůt·
leit dú nieman kan beschowen·
dur not so lide ich den rúwen·
wan es sich ze hohe lůt·
wirt mir dú minne vngůt·
so sol ir niemer man volle trúwen·